[A:4]བཤད་སྒྲུབ་བརྩོན་པའི་བྱི་དོར་ལེགས་བསྒྲུབས་པས༎
སྒྲིབ་བྲལ་ཆོས་སྐུའི་རང་འོད་འབར་བ་ཅན༎
གང་ལ་གང་འདོད་ཆོས་ཀྱི་ཆར་ཆེན་གྱིས༎
གདུལ་བྱའི་རེ་བ་མ་ལུས་ཡོངས་སུ་གང༎
དེ་སླད་ནོར་བུའི་ཁྱིམ་དུ་ཚོང་པའི་བློ༎
འགག་པ་མེད་པ་རབ་ཏུ་འཇུག་པའི་ཚུལ༎
མཁས་བཙུན་བཟང་པོའི་རང་བཞིན་ལས་འོངས་པའི༎
སྐུ་གསུང་ཐུགས་ཀྱི་ལེགས་བྱས་གཏམ་དུ་གླེང༎ ༎
གང་ཡང་བདེ་བར་གཤེགས་པའི་རིང་ལུགས་པ་ཆེན་པོ། རང་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། ཡོངས་རྫོགས་གནས་ལྔ་མཁྱེན་པའི་པཎྜི་ཏ། ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པའི་ཚུལ་ལ༎ གླེང་བསླང་སྔོན་བྱུང་གི་རྣམ་པར་ཐར་པའི་ངེས་གསང་མདོ་ཙམ་ཞིག་སྨོས་པ་ཡང་འདི་ལྟ་སྟེ།
དབུས་འགྱུར་ཚལ་ན་གང་ཡང་མཚན་བཞག་པ༎
རྟ་དབྱངས་ཞེས་གྲགས་སྙན་ངག་མཁས་པའི་མཆོག༎
དབྱངས་ཅན་ཡིད་ཀྱི་མཛའ་བོ་དྲེགས་ལྡན་དེས༎
རྒྱལ་བའི་མཛད་པའི་ཕྲེང་བ་རྒྱ་ཆེར་སྤེལ༎
སྙིང་རྗེའི་ཉམས་བརྒྱས་རོལ་པའི་རྒྱལ་སྲས་ཀྱིས༎
འགྲོ་ལ་ཕན་ཕྱིར་རང་གི་ལུས་སྲོག་ཀྱང༎
ཕངས་པ་མེད་པར་གཞན་ལ་སྦྱིན་པའི་གཏམ༎
ཐོས་ཚེ་ཡིད་ཀྱི་སྤུ་ལོང་འབད་མེད་གཡོ༎
ཐུབ་པའི་གསུང་རབ་སྡེབས་ལེགས་སྙན་ངག་གང༎
སྨྲ་མཁས་དཔའ་བོས་རྗེས་སུ་བསྐུལ་བ་ན༎
ཐོས་པས་རབ་དགའ་དད་པའི་ཡིད་མགུ་བ༎
ཐར་པའི་ས་བོན་སྲིད་མཐའི་བར་དུ་བསྐྲུན༎
དེ་ཡང་འདི་སྐབས་རྣམ་ཐར་རྡོར་རྒྱལ་མ་ལས། བཅོམ་ལྡན་འདས་ཀྱིས་འཇམ་དཔལ་རྩ་བའི་རྒྱུད་ལས། ཕ་ཁོལ་ལུང་བསྟན་པའི་སྐབས་སུ། བདག་ཉིད་ཆེན་པོ་འདི་ཉིད་ཀྱི་ཡང་མཚན་གྱི་ཆ་མཚོན་ཚུལ་དང། ཡང་མདོ་ལས། སྟོན་པས་གདུལ་བྱ་རྟ་དབྱངས་འདུལ་བྱེད་ཨཱརྱ་དེ་བ་རྣམས་ཀྱི་ངེས་གནས་གསལ་པོ་གསུངས་ཚུལ། དེ་དག་གི་ལོ་རྒྱུས་མཐའ་བཅད་རྣམས་ཀྱང་ཇི་ལྟ་བར་བྲིས་ཤིང། ཡང་རྒྱལ་བས་རྔ་བོ་ཆེའི་མདོར། ཀུན་མཁྱེན་དོལ་བུ་