[A:3]གནས་དང་གནས་མ་ཡིན་འདི་ཞེས༎
ཕྲ་རྒྱས་སྤུ་རིས་སོ་སོར་ཕྱེ༎
གསེར་དང་ར་གན་འདྲེས་པ་ལྟའི༎
ཚིག་དོན་ལྡིབ་པོ་ཇི་སྙེད་དག༎
ཡོངས་དཔྱོད་རྣམ་དཔྱོད་ནོར་བུ་ཡིས༎
དམན་པ་བསལ་ནས་མཆོག་སྦྱིན་མཛད༎
འཁོར་བའི་རྒྱ་མཚོ་ལས་བརྒལ་ཏེ༎
ཐམས་ཅད་མཁྱེན་གྲོང་ཉམས་དགའ་བར༎
བསླབ་གསུམ་གྲུ་གཟིངས་མ་བཅས་པར༎
སྙིང་སྟོབས་རྐྱལ་གྱིས་ཇི་ལྟར་ཕྱིན༎
འཁོར་བ་མ་རིག་མུན་སྟུག་འཕྲང༎
མང་ཐོས་སྒྲོན་མེ་ལག་ཐོགས་ནས༎
ངན་འགྲོའི་གཡང་ལ་རབ་བཟུར་ཏེ༎
ཐར་པའི་ལམ་ལ་རྗེས་འགྲོ་ཉིད༎
གང་ཡང་དད་པའི་རྗེས་ཞུགས་ཡིད་ལ་ཚིག་འབྲུ་ཐོས་པས་ཚིམ་པ་སྟེར༎
གང་དག་ཆོས་ཀྱི་རྗེས་འབྲང་བློ་ཅན་དོན་བཟང་གཏན་ཚིགས་མགུ་བསྐྱེད་དེ༎
གང་ཞིག་ཡོན་ཏན་རྒྱན་ཕྲེང་ལ་དགའ་མཁས་མང་ཡིད་ཀྱི་འདོད་འཇོ་བ༎
གང་གི་བློ་གྲོས་ཡི་གེར་འཕོས་འདྲས་ནང་གི་དེ་ཉིད་མཚོན་པར་བྱས༎
གཏིང་མཐའ་མི་མངོན་རྣམ་ཐར་ཆུ་གཏེར་ལས༎
ཉེ་བར་དྲངས་པའི་ལེགས་བཤད་དལ་འགྲོའི་རྒྱུན༎
རབ་བརྗིད་སྙན་ངག་རྦ་ཀློང་གཡོ་བ་ཅན༎
མདོ་རྒྱུད་ཆུ་ཀླུང་ཀུན་འདུའི་རྒྱ་མཚོ་ལ༎
དམ་ཆོས་ཡིད་བཞིན་ནོར་བུའི་བང་མཛོད་ཅན༎
ལུང་རིགས་རྙོག་མེད་གདེང་ཀས་མངོན་པར་མཛེས༎
སྟོང་ཉིད་སྙེམས་པའི་ཕུཊ་སྒྲའི་སྒྲ་སྒྲོག་པ༎
པཎ་གྲུབ་ཀླུ་དབང་དེ་ལ་སྙིང་ནས་དད༎
ཁྱོད་ཐུགས་དཔལ་གྱི་བེའུ་ལས་སོན་པའི༎
རང་རིག་རང་གསལ་ཆོས་དབྱིངས་གདོད་མའི་དབྱིངས༎
འོད་གསལ་སྣང་བའི་སྒྲོན་མེ་ནོར་བུའི་ཏོག༎
ཉམས་ལེན་སྒྲུབ་པའི་རྒྱལ་མཚན་གཙུག་ན་མཐོ༎