[A:17]གཞན་འཕྲུལ་བདག་པོའི་བུ་མོ་ཁེངས་ལྡན་མ༎
མེ་ཏོག་མདའ་ཅན་མ་དེ་སྐྱེངས་ཏེ་ཞུམ༎
རང་བཞིན་གྱིས་གྲུབ་ཚངས་སྤྱོད་གསལ་བའི་ཚོན༎
ཐུན་མཚམས་ལི་ཁྲིའི་མདངས་འཕྲོག་སངྒ་ཙི༎
ཕན་ཚུན་མཛེས་པའི་དཔལ་བཟང་འགྲན་པའི་ཟོལ༎
སྐལ་བཟང་མིག་གི་བདུད་རྩིར་ཡོངས་ལ་བསྒྲགས༎
སྔོན་གནས་རྗེས་སུ་དགོངས་པའི་རང་ཉམས་ཅན༎
ཁྱེད་ཐུགས་མེ་ལོང་མ་ཕྱིས་ངང་གིས་གསལ༎
མ་འོངས་གཟུགས་བརྙན་ཤར་བའི་ཟློས་གར་ཆ༎
བྱིས་པའི་འཁོར་ལ་མཛུབ་མོའི་བརྡ་ཡིས་བསྟན༎
སྟོན་པ་སངས་རྒྱས་རང་བྱུང་བསྙེན་རྫོགས་ལྟར༎
ཁྱེད་ཀྱང་རང་བྱུང་ངུར་སྨིག་གོས་མཆོག་འཛིན༎
སླད་ནས་མཁན་སློབ་ཁྲིམས་ཀྱི་རྗེས་འགྲོ་བ༎
དངོས་སུ་གླང་ཆེན་ཁྲུས་འདྲ་སྟོན་མིན་གཏན༎
ཞེས་པཎྜི་ཏ་ཆེན་པོ་ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པ་ཞིབ་མོ་རྣམ་པར་འབྱེད་པ་ལས། གཞོན་ནུའི་སྐབས་ལས་རྗེས་སུ་བསྒྲགས་པའི་རབ་ཏུ་བྱེད་པ་གསུམ་པའོ༎
Chapter 4: rab tu byung zhing dge tshul gyi tshul khrims rjes su mnos pa'i skabs
དེར་སྐྱོར་མོ་ལུང་གི་ཆོས་གྲྭ་དེ་ཉིད་དུ་བཞུགས་པའི་སྐབས། མཁན་ཆེན་ཆོས་རྒྱལ་དཔལ་བཟང་པོས། སྤྱན་གྱི་འབྲས་ལྟར་གཅེས་སྤྲས་སུ་གནང་ཞིང། དངོས་དང་བརྒྱུད་ནས། འདི་ལ་གངས་ཅན་གྱི་ལྗོངས་ཀྱི་འདུལ་བ་འཛིན་པ་ཐམས་ཅད་ཀྱི་མཆོག་ཏུ་གྱུར་པ་ཅིག་ཡོང་ངེས་ཤིང། རྣམ་སྲས་འཁོར་བཅས་ཀྱང་ལུས་དང་གྲིབ་མའི་ཚུལ་དུ་རྗེས་སུ་འབྲང་བར་འདུག་གོ་གསུང་ཞིང་བཀའ་ལས་ཀྱང། ངེད་རང་བྱིས་པ་ལོ་དགུ་ལོན་པའི་སྐབས། སྐྱོར་མོ་ལུང་ཚོར་ཡུན་རིང་བསྡད། དེ་དུས་ནས་གྲེ་ལྕེ་ལྷག་པར་བདེ་བ་དང། བརྗོད་པ་གཙང་བར་ཡོད་པས། ཁོང་ཆེ་བགྲེས་འགའ་རེ་རྣམ་སྲས་ཀྱི་དབྱངས་གྱེར་བའི་ལད་མོ་ཟློས་པས། དབྱངས་རྟ་ཚིག་སྦྱོར་དག་ཡུད་ཙམ་གྱིས་ཤེས་ཤིང། རང་རེ་གཏོལ་ཅི་ཡང་མེད་པའི་བྱིས་ཆུང་ཡིན། མཁན་ཆེན་ཆོས་སྐྱབས་པས་དགོངས་པས་དཔྱད་ནས་ཕྱག་རྡོར་འགྲོ་བཟང་མའི་དབང་དང། རྣམ་སྲས་རིགས་བརྒྱད་ཀྱི་རྗེས་གནང། རྡོ་རྗེས་འོག་གར་མཁན་མཆོག་