[A:18]སོགས་ཀྱི་རྒྱུད། འགྲོ་བཟང་སྙིང་པོ་ཟངས་དཀར་ལོ་ཙ་བ་དང། རྦལ་ཏི་དགྲ་བཅོམ་པ་སེ་བ་ཅན་པ་ཡོན་ཏན་ཚུལ་ཁྲིམས་སོགས་ཀྱི་ཡི་གེ་མང་པོའི་ལུང་ཐོབ། དེ་དུས་རྣམ་སྲས་དཀར་པོའི་རྗེས་གནང་ཞུས་ཉིན། རང་རེའི་རྨི་ལྟས་ལ་མི་དཀར་པོ་དར་དཀར་པོའི་གོས་གྱོན་པའི་ཕུ་དུང་ནང་ནས། ངེད་ལ་མགྲོན་བུ་དཀར་པོ་མང་པོ་ཐུ་བར་སྦྱིན་བྱུང་བ་བགྲངས་པས་བརྒྱད་ཅུ་ཙམ་འདུག་ཅིང་དྲུག་ཅུ་རེ་གཅིག་གཉིས་པའི་གྲངས་ཀྱི་མགྲོན་བུ་དེ་ལ་ནག་ཐིག་དཀྱིལ་ན་ཡོད་པ་བྱུང། སང་དེ་སྔ་མོར་མཁན་རིན་པོ་ཆེ་ལ་ཞུས་པས། དེ་ཚེ་ཚད་ཡིན། དྲུག་ཅུ་སྐོར་ལ་ཨེ་དོག་ཟེར་བའི་ལུང་བསྟན་དུ་འདུག་གོ་གསུང་བ་བྱུང་གསུང་ངོ༎
དེ་ལྟ་ན་མེ་མོ་ལུག་ལ་ལྷུམ་སུ་ཞུགས། ས་ཕོ་སྤྲེའུ་ལ་སྐུ་བལྟམས་ནས། ས་མོ་བྱ་ལྕགས་ཕོ་ཁྱི་རྣམས་ལ་གསང་མདའ་བང་རིམ་རང་དུ་བཞུགས། ལྕགས་མོ་ཕག་ལ་ཡུམ་གཤེགས་ཤིང། དེ་ལོ་ནས་ཆུ་ཕོ་བྱི་བ། ཆུ་མོ་གླང། ཤིང་ཕོ་སྟག་གི་བར་སྤང་ཁ་ཆོས་སྡིངས་ཁོ་ན་དང། ཤིང་མོ་ཡོས། མེ་ཕོ་འབྲུག་གཉིས་ལ་སྐྱོར་མོ་ལུང་གི་ཆོས་གྲྭར་འབྲི་ཀློག་གི་ཚུལ་བསྟན། དེར་མེ་མོ་སྦྲུལ་གྱི་ལོ་གསར་ལ་རོང་སྟོན་ཆེན་པོ་སྐྱོར་མོ་ལུང་དུ་ཕེབས་པ་དང། ཐོག་མར་མཇལ་ཞིང། དེ་ཉིད་ནས་ཕྱགས་ཕྱིར་འབྲངས་ཏེ། བདག་ཉིད་ཆེན་པོ་དགུང་ལོ་བཅུར་ཕེབས་པ་ཙམ་གྱི་དུས་དེར་ཤེལ་གྲོང་གི་གཙུག་ལག་ཁང་དུ། བསྟན་པ་རིན་པོ་ཆེའི་སྒོར་ལེགས་པར་འཇུག་པར་མཛད་ནས་ཤཱཀྱ་མཆོག་ལྡན་ཞེས་མཚན་དུ་བཏགས་ཤིང། བརྒྱུད་པ་ནས་བརྒྱུད་པར་བཅས་པས་ཞལ་གཟིགས་པའི་ལྷག་པའི་ལྷ་བཅོམ་ལྡན་འདས་མི་གཡོ་བ་དཀར་པོའི་ཤེས་རབ་བློ་འཕེལ་གྱི་རྗེས་སུ་གནང་བ་ཡང་སྩལ་ཞིང། ཆོས་རྗེ་དོན་ཡོད་དཔལ་བ་ལ་རོང་སྟོན་ཆེན་པོས་དངོས་ཀྱིས་བཀའ་ལུང་བྱོན་པ་ལ་ཡང། འདི་ངའི་གྲོགས་པོ་དམ་པ་བག་གཞོན་གྱི་སྐྱེ་བ་འཁྲུལ་མེད་ཡིན་ཞིང། ད་རེས་སྣེ་པ་སོགས་ཀྱིས་དགག་དགོས་གཅད་ཕྱིར་བར་མ་རབ་བྱུང་ཙམ་ལ་གཞག་པ་