[A:12]ལེན་པའི་སྐལ་བ་ཡང་མཆོག་ཏུ་ཐོབ་བོ༎
དེར་སྤང་ཁ་ཆོས་སྡིང་སུ་དགུང་ལོ་ངོ་གསུམ་དུ་གཟིགས་ཙམ་ལ་ཕེབས་ཤིང། སྐུ་གཞོན་ནུ་ནས་དེར་བཞུགས་པས། སྐྱོར་མོ་ལུང་པ་རྣམས་ཆོས་རྗེ་ཆེན་པོ་བ་ངེད་ཀྱི་སྤང་ཁ་ཆོས་སྡིངས་སུ་བལྟམས་ཞེས་ཀྱང་སྨྲའོ༎
དེ་སྐབས་བལ་པོ་ཨ་སུའི་གདུང་རྒྱུད་དངོས་གྲུབ་སྡིངས་ཀྱི་དགོན་པ་ནས། བླ་མ་སྔགས་འཆང་བགྲེས་པོ་མཚན་རྟ་མགྲིན་ཡང་དག་གྲུབ་པ་ཞུ་བ་ལས་རྟ་མགྲིན་གྱི་བཀའ་ལེགས་པར་ནོད་ཅིང། མཚན་ཡང་རྟ་མགྲིན་མགོན་པོར་གསོལ་ལོ༎
བཀའ་ལས་ངེད་རང་བྱིས་པའི་དུས་འབྲུག་སྒྲ་སེར་བ་རླུང་ནག་སོགས་ལ་སྡིག་འཛུབ་གཏད། ད་ལྟའི་རྟ་མགིན་སྔགས་འདི་ལས་མང་བ་ཞིག་བློ་ལ་འདུག་པ་དེ་བཟླས་པས་ཐུབ་པ་ཡོད་གསུང་ཞིང། ད་ལྟའི་སྔགས་ཞེས་པ་གསར་མའི་རྟ་མགྲིན་ཡོངས་ཁྱབ་ཡིན་ལ། ཕྱིས་དངོས་གྲུབ་སྡིངས་ཀྱི་བླ་མས་བོས་ནས་དགོན་གནས་དེར་བདག་གིས་ཕྱིན་སྐབས་དེའི་ཚུལ་རྩད་བཅད་པས། རྟ་མགྲིན་ལྕགས་རལ་རྙིང་མ་ལུགས། སྔགས་འབྲུ་ཡང་པི་ཤ་ཙི་ཤ་ཟའི་སྒྲ་ལྟར་ཡོད་པ་ཞིག་ཀྱང་འདུག་གོ༎ བླ་མ་འདི་ཡང་བཤེས་གཉེན་དམ་པ་བཅུ་ཕྲག་བཞིའི་བྲི་བྱ་དང་ཡི་གེ་གཉིས་ཀ་ལ་མི་བཞུགས་སོ༎
དེ་ལྟར་སྤྲུལ་པའི་སྐུ་དེ་རབ་བཞག་ནས༎
སྤྲུལ་པའི་ཡུམ་མཆོག་མཁའ་སྤྱོད་ཞིང་ལ་བཞུད༎
སྤྲུལ་པས་སྤྲུལ་པའི་སྣང་བ་རྗེས་སྤེལ་བ༎
སྒྱུ་མས་སྒྱུ་མའི་སྣང་བ་འདོར་ལེན་འདྲ༎
གཙང་དག་དབེན་པའི་རི་ཁྲོད་དེར༎
ཆགས་མེད་རི་དགས་ཕྲུ་གུ་བཞིན༎
སྡིག་བྲལ་ཟས་ཀྱིས་ཉེར་འཚོ་བ༎
ཁྱོད་ཀྱི་རྣམ་ཐར་རྗེས་སུ་དྲན༎
དགའ་ལྡན་ལྷ་གནས་བདུད་རྩིའི་བཏུང་བ་ལ༎
མི་སྲེད་དམན་གནས་ཆུ་གཙང་གིས་ངོམས་པའི༎
རབ་ཞི་དྲང་སྲོང་ཁྱོད་ལ་གུས་པའི་ཡིད༎
དྲངས་པ་མེད་ཀྱང་དད་པའི་ཤུགས་དེར་སོང༎
པཉྕ་ལི་ཀའི་ལྷ་རྫས་གོས་མཆོག་དག༎
སྦྲུལ་ཤུན་བཞིན་དུ་དོར་ནས་སྣལ་མའི་གོས༎
ཁྲེལ་ཡོད་ངོ་ཚའི་ཚུལ་གྱིས་ལེགས་བགོས་ཁྱོད༎
གོས་མཆོག་ཚུལ་ཁྲིམས་རྒྱན་གྱིས་