[A:11]བདེ་བླག་ཏུ་མ་མཚོན་ཞིང་མ་གོ་བར་བཙུན་མ་རང་གི་བུ་ལ་དགའ་གདུང་ཆེ་ཞེས་སྒྲོག་ཅེས་ཀྱང་ཐོས་སོ༎
དེར་ལོ་ངོ་གསུམ་ཙམ་དུ་ཡུམ་དེ་ཉིད་ཀྱིས་བཀུར་སྟི་དང་བསྟི་སྟང་གི་གཙང་སྦྲས་དག་པའི་ཞབས་ཏོག་ལེགས་པར་ཕུལ་ནས། སླར་སྤྲུལ་པའི་སྐུ་ཉིད་ནར་སོན་པའི་སྣང་བས་ཡིད་ཚིམ་པ་ཐོབ་སྟེ། ཡུམ་རང་གི་གཉེན་དང་འབྲེལ་པ་འཛིན་ཞིང། ཆོས་ཀྱི་དམ་ཚིག་གིས་འབྲེལ་བའི་སྤང་ཁ་ཆོས་སྡིངས་པའི་བཙུན་མ་ཨ་ནེ་བསམ་གྲུབ་འདྲེན་མ་བྱ་བ་ཞིག་ལ་ཡོངས་སུ་གཏད་དེ། ངའི་བྱིས་པ་འདི་ཉོན་མོངས་པས་བསྐྱེད་པ་མིན་ཞིང། འདིས་སངས་རྒྱས་ཀྱི་བསྟན་པ་རིན་པོ་ཆེ་འཛིན་ཞིང་སྤེལ་བར་བྱེད་པའི་མཐུ་དང་ལྡན་པ་ཉིད་ཡིན་པས་གཙང་སྦྲས་མཐོ་བའི་གཅེས་སྤྲས་སུ་མཛོད་ཅེས་ཕྲིན་དུ་བཞག་ནས་སྤྲུལ་པ་མོ་དེ་ནི། ན་བ་སོགས་ཀྱི་སྣང་བ་ཅི་ཡང་མེད་པར་གང་གང་ནས་འོངས་པའི་ཞིང་མཁའ་ལ་སྤྱོད་པའི་ཕོ་བྲང་དེར་ཡུད་ཀྱིས་ཐེགས་སོ༎
དེ་མཚམས་རྗེ་ཉིད་རང་ཡུམ་གྱི་རང་དབང་དུ་གྱུར་པའི་དངོས་པོ་ཕྲ་བ་དག་ཅིག་ཀྱང་ལྷན་དུ། སྐྱོར་མོ་ལུང་གི་ཆོས་སྡེའི་ལྷོ་ཕྱོགས་ཀྱི་སྤང་ཁ་ཆོས་སྡིངས་ཞེས་གྲགས་པའི་དབེན་དགོན་དེར་བྱོན་ཞིང། ཕྱིས་པཎ་ཆེན་རིན་པོ་ཆེ་ཉིད་གཙང་ནས་ཕེབས་རེས་ཅིག། སྐྱོར་མོ་ལུང་གི་འགའ་ཁང་གྲྭ་ཚང་དུ་སྤྱན་དྲངས་པའི་ཕྱགས་ཕྱིར་མངའ་རིས་པའི་གྲྭ་པ་འགའ་རེས་ཀྱང་ཕྱིན་པས། གྲྭ་ཚང་གི་ཆུ་བན་ཞིག་སྤྱན་གྱིས་གཟིགས་འཕྲལ་དགེ་སྐོས་ལ། དེ་ག་རེ་གསུངས། སྐུ་མདུན་དུ་བཞག་པ་དེ་ལ་ཕྱག་སོར་གྱིས་ཡང་ཡང་རེག་ཅིང། འདི་ངའི་མ་དེའི་ཡིན་ཞེས་བརྩེ་གདུང་གི་རྣམ་པ་ཆེན་པོ་སྟོན་པ་གནང་ཞེས། དེ་དུས་གྲལ་ཡོད་པའི་དྲུང་བཙུན་ཤེས་རབ་དཔལ་འབྱོར་བའི་གསུངས་ལས་དངོས་སུ་ཐོས་པ་སེམས་ལ་བཞག་ནས། ཕྱིས་སྐྱོར་མོ་ལུང་དུ་ཕྱིན་སྐབས། འགའ་ཁང་པའི་ཆེན་པོ་བ་ལ་རྩད་བཅད་པས་ཡོད་ཟེར། སྤོས་ཀྱི་དུད་པས་སྤྱན་དྲངས་ནས། དད་པའི་བགོ་སྐལ་མི་དམན་པའི་དབང་ལས། བདག་ཅག་གིས་ཕྱག་བསྟབ་པ་དང། སྤྱི་བོར་