[A:438]པོ་ཆེ་ཇི་སྙེད་བྱོན་པ་དེ་དག། བཤེས་གཉེན་ཆེན་པོ་དེས་བྱིན་གྱིས་བརླབས་པའི་སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི་སྤྲུལ་པ་ཉིད་དུ་གདོན་མི་ཟ་བར་ངེས་སོ༎
གང་ལྟར་ཡང་རུང་སྟེ། རྒྱལ་སྲས་ཆེན་པོ་དག་ཏུ་མཚོན་པར་བྱེད་པའི་ཆོས་འདི་ལྟ་སྟེ། རྟག་ཏུ་སྐྱོན་རིག་པས་ཁྱིམ་ན་གནས་པ་ལ་མངོན་པར་མི་དགའ་ཞིང། འདོད་པའི་ཡོན་ཏན་མཐའ་དག་ལས་སེམས་བསྲུང་བ་དང། ནམ་ཡང་ངེས་པར་འབྱུང་བ་ལ་དགའ་ཞིང། ལེགས་པར་གསུངས་པའི་ཆོས་འདུལ་བ་དག་ལ་གཅེས་སྤྲས་སུ་བྱ་བ་དང། སྐྱེ་བོ་མཐའ་དག་ལ་བྱམས་ཤིང་ཁོང་མི་ཁྲོ་བས་སྙན་པར་སྨྲ་བ་དང། བཞིན་གྱི་མདངས་གསལ་བས་གསོང་པོར་སྨྲ་ཞིང། ཡོ་བྱད་ཀྱི་ཁྱད་པར་ཅི་འབྱོར་པ་དག་སྦྱིན་པར་སྤྲོ་བ་སྟེ། ཆོས་འདི་དག་གང་ལ་ཡོད་པ་དེ་ནི་རྒྱལ་སྲས་ཆེན་པོར་མཚོན་པའི་ཆོས་ཐོག་མར་དགེ་བ་སྟེ། དེ་དག་ཀྱང་རྗེ་བཙུན་འདི་ལ་གཞོན་ནུར་གྱུར་པའི་དུས་ཉིད་ནས་མངའ་བའོ༎
བྱང་ཆུབ་སེམས་དཔའི་ཚུལ་ཁྲིམས་ཉིན་མཚན་གྱི་ཐུན་བཞིར་ལེན་པ་ལས་མི་གཡེལ་ཞིང། རྟག་ཏུ་དགེ་བའི་བཤེས་གཉེན་བསྟེན་པ་ལ་མངོན་པར་དགེས་པ་དང། བྱང་ཆུབ་སེམས་དཔའི་སྡེ་སྣོད་དག་ཀློག་པ་དང། འདྲིས་ཤིང་ཀུན་ཆུབ་པར་བྱེད་པ་ལ་འགྲུས་པ་མི་ལྷོད་པ་དང། གཞན་ལ་ཐོ་མི་འཚམས་ཞིང། ཕྲག་དོག་པ་དང། རང་ལ་ཁེངས་པའི་དུག་གིས་མ་གོས་པ་དང། དཀོན་མཆོག་མཆོད་པ་ལ་བརྩོན་ཞིང། ཕྱི་ནང་གི་བདོག་པ་ཐམས་ཅད་གཏོང་བར་ཞུགས་པ་དང། མང་དུ་ཐོས་པས་ངོམས་མི་ཤེས་ཤིང། སེམས་ཅན་གྱི་དོན་ལ་སྐྱོ་བ་སྤངས་པ་ཞེས་བྱ་བ་འདི་དག་ནི། རྒྱལ་སྲས་ཆེན་པོར་མཚོན་པའི་ཆོས་བར་དུ་དགེ་བ་སྟེ། དེ་དག་ཀྱང་རྗེ་བཙུན་འདི་ལ་མངའ་བའོ༎
དངོས་གྲུབ་ཀུན་གྱི་རྩ་བ་རྡོ་རྗེ་འཛིན་པ་ཉིད་སྒོ་