[A:422]ཀྱང༎
བློ་མཚོའི་མེ་ལོང་བརྙོགས་པ་ལ༎
ཐུབ་པ་སྐལ་མེད་མིག་གི་ནི༎
ལམ་དུ་མི་འགྱུར་བ་དེ་བཞིན༎
དེ་དེར་གྱུར་ལ་མྱ་ངན་ཅི༎
ཉི་ཟླ་ནུབ་དང་འཆར་བ་ཡི༎
རིམ་པས་སྣང་བར་བྱེད་དེ་བཞིན༎
འཚུར་ནུབ་རིམ་གྱིས་འཇིག་རྟེན་ཁམས༎
ཕན་དང་བདེ་བས་གང་བར་ཤོག༎
3.3.2
གཉིས་པ་རྗེས་ཀྱི་མཛད་པ་ཇི་ལྟར་གྲུབ་པ་ནི། དེ་ལྟར་རིག་པ་འཛིན་པའི་གནས་སུ་བདེ་བར་གཤེགས་རྗེས་ཀྱི་གཟའ་ཚེས་འཛོམ་པའི་དུས་སུ། སྐུ་གདུང་གི་སྙིང་པོ་ཞུགས་ལ་ཞེན་པར་གྱུར་པ་དེའི་ཚེ། གྲུབ་མཐའ་བསྙོགས་པའི་རྟགས་སུ་ཐོག་མར་ནམ་མཁའ་གཡའ་དག། ཞིང་སོ་སོར་གཞན་དོན་ཕུན་སུམ་ཚོགས་པ་འབྱུང་བའི་རྟེན་འབྲེལ་དུ། ཁ་དོག་སྣ་ལྔ་དང་ལྡན་པའི་འོད་ཟེར་ཕྱོགས་བཅུར་འཕྲོ་བའི་སྤྲིན་དང་འཇའ་ཚོན་གྱི་རི་མོ་རྣམ་པར་བཀྲ། ལྷའི་དབང་པོ་དང་འཇིག་རྟེན་སྐྱོང་བ་བཞིའི་མཆོད་འོས་སུ་གྱུར་པའི་ལྟས་སུ། ལྷའི་མེ་ཏོག་གི་ཆར་ཆེན་པོ་ཉིན་མཚན་བཅོ་ལྔ་ཙམ་དུ་སྦྲེལ་ནས་བབས། འབྱུང་བ་ལྔའི་རླུང་འོད་ཟེར་ལྔ་ལྡན་ཐ་མ་མཆོག་ཏུ་ཐིམ་ནས་འགྱུར་མེད་བདེ་བ་ཆེན་པོ་བརྙེས་པའི་རྟགས་སུ། ཁ་དོག་རྣམ་པ་ལྔའི་འོད་ཟེར་ཅན་གྱི་རིང་བསྲེལ་རིན་པོ་ཆེའི་ངོ་བོ་ཉིད་དུ་གྱུར་པ་གྲངས་ལས་འདས་པ་དག་གསལ་པོར་བྱོན་པ། ཐོག་མ་ཉིད་ནས་བུ་སློབ་སོ་སོའི་རྟེན་སྐལ་དུ་བྱོན་པ་དག་ནི་རྩོད་པ་དང་བྲལ་ཞིང་བསམ་གྱིས་མི་ཁྱབ། དུས་ཕྱིས་ནང་རྟེན་གྱི་དབུས་སུ་བཞུགས་པ་དང། ཐག་རིང་པོའི་རྟེན་སྐལ་དུ་འགྱེད་མཛད་ཀྱི་གདུང་ཚ་འབུམ་ཕྲག་ཙམ་བཏབ་པ་ལ། གདུང་ཚ་རེ་རེའི་ཏོག་ཏུ་རིང་བསྲེལ་ཡུངས་ཀར་ཙམ་བྱོན་པ་ནི་ཤིན་ཏུ་མང་ཞིང། ལྔ་དྲུག་ཙམ་དང། ཐ་ནའང་རེ་རེ་ཙམ་མ་བྱོན་པ་ནི་མ་བྱུང་བར་ཀུན་གྱི་འཐུན་སྣང་དུ་གྲུབ། དགོངས་རྫོགས་དང་གསོལ་འདེབས་ཀྱི་རིམ་པ། གདུང་རབས་གོང་མ་རྣམས་ལ་ཕྱག་སྲོལ་ཇི་ལྟར་ཡོད་པ་བཞིན་དང། དེ་ལས་ཀྱང་ཁྱད་པར་དུ། ན་ལནྟྲར་དགེ་འདུན་གྱི་ཚོགས་པ་ཁྲི་ཚོ་ཙམ་བསགས། ཆོས་འཁོར་གྱི་གྲལ་དབུ་ལ། ནེའུ་ཐོགས་ནས་གླིང་སྟོད་གདན་ས་བ་ཆོས་རྗེ་ནམ་མཁའ་