[A:421]ཉམས་མང་པོ་རང་བྱུང་བས། གཟིགས་ཐག་ཆོད་ནའང། ཞལ་བཞེས་མི་མཛད་པ་ནི་ཁོང་པ་རང་གི་ཆོས་ལུགས་ཡིན་ཞེས་ཟེར། བྲག་དཀར་དུ་བསྙུང་ཚུལ་དེ་ལྟར་བསྟན་པའི་འཕྲོ་ཉིད་ནས། ཚེས་བཅུ་གཉིས་ཀྱི་ཐོ་རངས། སྔ་ཐུན་གྱི་ཐུགས་དམ་གྱི་རིམ་པ་རྫོགས་པར་ཟིན་ནས། བླ་མ་གོང་མ་རྣམས་བདེ་བར་བསྐྱོད་པའི་ལམ་ནི་གསལ་པོ་དེ་ཉིད་དོ༎ ཞེས་ཐུགས་ཁར་ཐལ་མོ་སྦྱར། འོད་གསལ་བ་དང་བསམ་གྱིས་མི་ཁྱབ་པའི་རིམ་པ་ཉིད་ནས་བདེ་བར་གཤེགས་སོ༎
དེ་ལྟར་ན། སྤྱིར་གསང་སྔགས་བླ་མེད་ཀྱི་ཟབ་ལམ་རྡོ་རྗེའི་རྣལ་འབྱོར་ལ་མངའ་བརྙེས་པ། ཐུན་བཞིའི་རྣལ་འབྱོར་ལ་མཆོག་ཏུ་གཞོལ་བ་རྣམས་ཀྱི་ནང་གི་ཡོན་ཏན། ཁམས་འདུ་ལུགས་དང། ལྟ་བ་རྟོགས་ཚུལ་དང། གྲུབ་མཐའ་བསྙོགས་པའི་རིམ་པ་རྣམས་བསམ་གྱིས་མི་ཁྱབ་པས་ན། འདིར་ཐུན་མོང་གི་རྣམ་པར་ཐར་པ་ཉིད་དུ་འབྲི་བར་ག་ལ་ནུས། དེ་ལྟ་མོད་ཀྱི། ཕྱི་རོལ་ནས་རྒྱལ་སྲས་ཆེན་པོར་མཚོན་པའི་རྟགས་དང་མཚན་མ་ནི། འདི་གང་ན་བཞུགས་པའི་གནས་དེར། བཟའ་བཏུང་དང་མཁོ་རྒུའི་ཡོ་བྱད་ཐམས་ཅད་ཆར་བཞིན་དུ་འབབ། ཕྱོགས་ཀྱི་ལ་སྒོ་དང་གསེར་དངུལ་ལ་སོགས་པའི་སྒོ་བྱེ། ཕྱོགས་ཀྱི་གྲྭ་རྒྱུན་དང་ཚོངས་པ་རྣམས་བདེ་བར་སླེབ། མཚུངས་མེད་ཀྱི་དགེ་བའི་བཤེས་གཉེན་ཉི་ཟླ་ལྟ་བུ་དང། དེ་སྲས་སྐར་མའི་ཚོགས་རྣམས་གསལ་བར་བྱོན་ཞིང་བདེ་བར་བཞུགས། དེ་དག་ནི་ཕྱིའི་མཚན་མ་ཡིན་ལ། ནང་གི་ཁྱད་པར་ནི། རྗེས་ཐོབ་ཀྱི་མཛད་པའི་ཁྱད་པར་ལས་རྟོགས་པར་ནུས་པའི་ཕྱིར་ན། ཇི་སྐད་དུ། ཤེར་ཕྱིན་ལས། ས་དང་པོ་ནས་ས་ལྔ་པའི་བར་ཡོངས་སུ་སྦྱོང་བའི་རྗེས་ཐོབ་ཀྱི་མཚན་མར་གསུངས་པ་དེ་ཐམས་ཅད་ཕྱག་བཞེས་སུ་མངའ་བར་ཕལ་ཆེར་གྱི་མངོན་སུམ་དུ་གྲུབ་པ་ཉིད་ལས་ཤེས་སོ༎
སྐལ་བཟང་གདུལ་བྱའི་ཚོགས་རྣམས་ཀྱི༎
བློ་མཚོའི་མེ་ལོང་དངས་པ་ལ༎
རྒྱལ་སྲས་སྐུ་གསུངས་ཐུགས་རྣམས་ཀྱི༎
རང་བཞིན་གསལ་བར་སྣང་མོད་