[A:422]kyang//
blo mtsho'i me long brnyogs pa la//
thub pa skal med mig gi ni//
lam du mi 'gyur ba de bzhin//
de der gyur la mya ngan ci//
nyi zla nub dang 'char ba yi//
rim pas snang bar byed de bzhin//
'tshur nub rim gyis 'jig rten khams//
phan dang bde bas gang bar shog//
3.3.2
gnyis pa rjes kyi mdzad pa ji ltar grub pa ni/ de ltar rig pa 'dzin pa'i gnas su bde bar gshegs rjes kyi gza' tshes 'dzom pa'i dus su/ sku gdung gi snying po zhugs la zhen par gyur pa de'i tshe/ grub mtha' bsnyogs pa'i rtags su thog mar nam mkha' g.ya' dag/ zhing so sor gzhan don phun sum tshogs pa 'byung ba'i rten 'brel du/ kha dog sna lnga dang ldan pa'i 'od zer phyogs bcur 'phro ba'i sprin dang 'ja' tshon gyi ri mo rnam par bkra/ lha'i dbang po dang 'jig rten skyong ba bzhi'i mchod 'os su gyur pa'i ltas su/ lha'i me tog gi char chen po nyin mtshan bco lnga tsam du sbrel nas babs/ 'byung ba lnga'i rlung 'od zer lnga ldan tha ma mchog tu thim nas 'gyur med bde ba chen po brnyes pa'i rtags su/ kha dog rnam pa lnga'i 'od zer can gyi ring bsrel rin po che'i ngo bo nyid du gyur pa grangs las 'das pa dag gsal por byon pa/ thog ma nyid nas bu slob so so'i rten skal du byon pa dag ni rtsod pa dang bral zhing bsam gyis mi khyab/ dus phyis nang rten gyi dbus su bzhugs pa dang/ thag ring po'i rten skal du 'gyed mdzad kyi gdung tsha 'bum phrag tsam btab pa la/ gdung tsha re re'i tog tu ring bsrel yungs kar tsam byon pa ni shin tu mang zhing/ lnga drug tsam dang/ tha na'ang re re tsam ma byon pa ni ma byung bar kun gyi 'thun snang du grub/ dgongs rdzogs dang gsol 'debs kyi rim pa/ gdung rabs gong ma rnams la phyag srol ji ltar yod pa bzhin dang/ de las kyang khyad par du/ na lantrar dge 'dun gyi tshogs pa khri tsho tsam bsags/ chos 'khor gyi gral dbu la/ ne'u thogs nas gling stod gdan sa ba chos rje nam mkha'