[A:57]བསྙེལ་མེད་དུ་གནས་པ་དེ་དང་དེ་དག་གཙོ་ཆེ་བ་ཡིན་ལ། དེ་ཡང་རྗེ་འདི་ཉིད་ནི་སློབ་མ་ལ་འཆད་པ་དང། ནང་དུ་ཡང་དག་འཇོག་པ་དང། ཐུན་མཚམས་ཀྱི་ཆོས་སྤྱོད་ལ་གཙོ་བོར་མཛད་པ་ཡིན་གྱི། སྔར་མ་གཟིགས་པའི་དཔེ་མང་པོ་ལ་གཟིགས་རྟོག་དང། བསྟན་བཅོས་གསར་དུ་རྩོམ་པ་ལ་གཙོ་བོར་མི་མཛད་དོ༎
དེའི་ཤེས་བྱེད་ཀྱང་བླ་མ་གོང་མའི་ཕྲིན་ལས་ལ་གནོད་པར་སོང་དོགས་པ་དང། རྗེ་རོང་ཆེན་པ་ཉིད་ཀྱང་སློབ་མས་དཔེ་ཆ་གསར་དུ་སྦྱར་བ་ལ་ཐུགས་དགྱེ་རྒྱུ་མེད་ཅིང། རང་རེས་དགོངས་པ་དེ་བཞིན་དུ་བསྒྲུབས་པ་ལ་ཐུགས་ལ་ཤིན་ཏུ་འདོགས་ཤིང། སྐུ་མྱ་ངན་ལས་འདའ་ཀར་ཡང། སློབ་དཔོན་དོན་ཡོད་དཔལ་རང་རེའི་དགོན་པ་འདི་ཉིད་དུ་རྟག་ཏུ་སྡོད་ལ། ཁོ་བོའི་གསུང་རབས་ལ་འཆད་ཉན་མ་ནོར་བར་གྱིས་ཤེས་གསུང་སྟེ། ཇི་བཞིན་མ་གྲུབ་པ་ལ་ཤིན་ཏུ་ངོ་གནོང་ཡང་ཕར་ཕྱིན་གྱི་?ཨིཀ་ཆེན་འདི་ལག་ཏུ་བླངས་ནས་ཚིགས་རིགས་འདོན་པ་པོ་རྒྱུན་མ་ཆད་ཙམ་བྱུང་བ་དང། ཚེས་བཅུ་བཞིའི་དུས་ཆེན་རེ་ཙམ་གང་འགྲུབ་བྱས་ན་དགོངས་པའི་ཆ་ཙམ་གང་བར་ཡོད་དོ་ཅེས་གསུང། དེ་ལྟར་ན་མདོ་སྡེ་བརྒྱན་གྱི་རྣམ་བཤད་རྒྱས་པ་བསྐུལ་བ་པོ་མི་ཆེན་གྱིས་འབུལ་བ་བཟང་བ་ལ་བརྟེན་ནས་སྦྱར་བ་དང། རིགས་གཏེར་གྱི་རྣམ་བཤད་བསྐུལ་བ་པོ་གླང་ཐང་སྤྱན་སྔ་ས་བཀས་གནང་གཡག་ཊིཀ་ལས་བཏུས་ཏེ་སྦྱར་བ་དང། རྩ་ཤེའི་རྣམ་བཤད་རོང་ཊིག་ལས་བཏུས་ཏེ་སྦྱར་བ་དང། རྣམ་འགྲེལ་གྱི་གཞུང་དོན། ཕར་ཕྱིན་གྱི་སྤྱི་དོན། རྒྱུད་བླའི་གཞུང་དོན་རྣམས་སློབ་མས་ཟིན་བྲིས་སུ་བཏབ་པ་ལ་རྗེ་ཉིད་ཀྱིས་སྦྱར་བར་མཚན་བཏགས་པ་རྣམས་ཡོད་དོ༎
རྩོད་པའི་ཚུལ་ཡང་རྗེ་རྒྱལ་རོང་པ་ཆེན་པོའི་ཟུར་ཆོས་པ་རྣམས་ཀྱི་ནང་ནས་རྩོད་པའི་ཁྱུ་མཆོག་ཏུ་གསལ་བར་གྲགས་ནས། དུས་དེར་རིགས་ལུང་གི་གྲྭ་འགྲིམ་པ་ཀུན་གྱིས་ཕར་ཚད་ཀྱི་ཟིན་ཐུན་རྩི་བར་མཛད་དོ༎
3.1.2
གཉིས་པ་གསང་སྔགས་ཀྱི་ཆོས་གསུངས་ཚུལ་ནི། རང་ལོ་དྲུག་ཅུ་པ་མན་ཆད་དུ་ནི་ཡབ་ཆོས་ལ་