[A:58]བརྟེན་པའི་རྟ་མགྲིན་གྱི་རྗེས་གནང་རེ་ཙམ་དང། མཚན་བརྗོད་སོགས་ཀྱི་ལུང་ཙམ་དང། མན་ངག་གི་དམིགས་པ་སྣ་རེ་ཙམ་ལས་གཞན་མེད་ལ། ཕྱིས་ནི་རྗེ་རོང་པ་ཆེན་པོའི་གསུང་ལས་བྱུང་བའི་གསང་འདུས། བདེ་མཆོག་གཤིན་རྗེ་བཤེད་སྐོར་གྱི་བཤད་པ་དགག་སྒྲུབ་གྱི་ལམ་ནས་དྲངས་པ་རྣམས་དང། ངན་སོང་སྦྱོང་རྒྱུད་ཀུན་རིག་གཞན་ཕན་འོད་ཟེར་གྱི་རྣམ་བཤད་རྒྱས་པ། ཀྱཻ་རྡོར་རྣམ་བཤད་གཞད་གནད་ཀྱི་ཟླ་ཟེར་དང། གཞན་ཡང་ཕྱག་ལེན་ཕྲན་ཚེགས་རྣམས་ལ་དག་མ་དག་གི་བཤད་པ་ཆེས་མང་བར་མཛད་དོ༎
དབང་དང་མན་ངག་གི་རིམ་པ་ལས་ནི། གླིང་དཀར་རྒྱལ་བུ་ལྷ་དབང་པ་ལ་ལམ་འབྲས་ཀྱི་ཁྲིད་རིམ། རྒྱུ་དུས་དང་ལམ་དུས་ཀྱི་དབང་དང་བཅས་པ་ཚར་གཅིག་མཛད། འབྲོག་རྒྱ་མཚོའི་ཆོས་མཛད་སོགས་སྒྲུབ་པ་པོ་སོ་སོ་ལ་རྣལ་འབྱོར་ཡན་ལག་དྲུག་པའི་ཁྲིད་ཀྱི་རིམ་པ་ཡོངས་རྫོགས། མཆོག་དབང་གོང་མ་གསུམ་དང་བཅས་པ་ཚར་བདུན་ཙམ་མཛད། བློ་སྦྱོང། དམར་ཁྲིད། དྲིལ་བུ་རིམ་ལྔ། བཤེད་དམར་སྤྲོད་མེད་སོགས་ནི་ཤིན་ཏུ་མང་བར་མཛད་པ་དང། ས་སྐྱོང་དང་མི་ཆེ་རྒུ་རྣམས་ལ་འཆི་བདག་འཇོམས་པ་དང། ཚེ་དཔག་མེད་ལྷ་དགུའི་དབང། རྡོ་རྗེ་ཆོས་སྐྱོང་དག་དང། མི་གཡོ་བ་དཀར་པོའི་རྗེས་གནང་ལ་སོགས་པ་མཛད་དོ༎
དེ་དག་ལ་འདི་སྐད་ཅེས།
འགྲོ་བ་འགའ་ཡི་སེམས་རྒྱུད་ལ༎
ཕན་དང་བྱིན་གྱིས་རློབ་པའི་ཕྱིར༎
དབང་དང་གདམས་པ་འགའ་མཛད་མོད༎
རྙེད་དང་བཀུར་སྟིའི་དགོངས་མི་མངའ༎
སྡེ་སྣོད་གསུམ་དང་རྟོག་གེ་དང༎
རྡོ་རྗེའི་ཐེག་པར་གང་བཤད་པ༎
རྒྱལ་བ་ཉིད་དང་རྗེ་གོང་མའི༎
དགོངས་པ་ཟབ་མོ་བསྐང་ཕྱིར་དང༎
རིང་དུ་གནས་པའི་ཕྱིར་དགོངས་ཀྱི༎
འཇིག་རྟེན་ལུགས་ཀྱི་ཆོས་བརྒྱད་པོ༎
སྒྲུབ་པའི་བསམ་པ་འདིར་མི་མི་མངའ༎ vc: Note that this line bears eight syllables; perhaps mi can be omitted!
ཞེས་བྱའོ༎
3.2
གཉིས་པ་བུ་སློབ་ཀྱི་མཆོག་ཇི་ལྟར་བྱུང་བ་ནི། སྤྱིར་ཕར་ཕྱིན་ཐེག་པའི་བཤད་ཉན་ལོ་གྲངས་ལྔ་བཅུ་ལ་ཐུག་པ་རྒྱུན་མི་འཆད་དུ་སློབ་མའི་གྲངས་བརྒྱ་ལས་མི་ཉུང་བ་ལ་མཛད་པ་དེ་དག་ཀྱང།