[A:305]མཛད་པར་གསན་ཅིང་ལེན་པར་མཛད་དོ༎
1.1.3
དེ་གཉིས་ཀ་མི་འགལ་བའི་རྒྱུ་མཚན།
གསུམ་པ་ནི། བདག་ཉིད་ཆེན་པོ་འདིའི་སྔོན་གྱི་ལོ་རྒྱུས་མི་འདྲ་བ་གསུམ་བྱུང་ཡང་འགལ་བ་མ་ཡིན་ཏེ། ཀཱ་མ་ལ་ཞི་ལ་དང། རྗེ་བཙུན་དམ་པ་རྒྱ་གར་ཐུགས་རྒྱུད་གཅིག་པའི་ཚུལ་ནི་དམ་པ་སངས་རྒྱས་ཀྱི་རྣམ་པར་ཐར་པ་ལས་འབྱུང་ལ། ལོ་ཙྪ་བ་རིན་ཆེན་མཆོག་དང། ཀཱ་མ་ལ་ཞི་ལ་དུས་མཉམ་དུ་བྱོན་ཀྱང་སྤྲུལ་པས་འགྲོ་དོན་སོ་སོར་མཛད་པ་ལ་འགལ་བ་མེད་དོ༎
དེ་དག་ལ་འདི་སྐད་ཅེས་བྱ་སྟེ།
མཁས་པའི་དབང་པོ་པདྨའི་ངང་ཚུལ་དང༎
གྲུབ་པའི་དབང་ཕྱུག་རྗེ་བཙུན་རྒྱ་གར་ཞབས༎
སྤྲུལ་པའི་ལོ་ཙ་རིན་ཆེན་མཆོག་གསུམ་པོ༎
བདག་ཉིད་ཆེན་པོའི་སྔོན་གྱི་ལོ་རྒྱུས་ཡིན༎
ཅེས་སྦྱར་བ་ཡིན་ནོ༎
1.2
སྐུ་ཚེ་འདིའི་རྣམ་པར་ཐར་པ་རྒྱས་པར་བཤད་པ།
གཉིས་པ་ལ། སྐུ་སྐྱེ་བ་ཇི་ལྟར་བཞེས་པའི་ཚུལ། དེ་ནས་སངས་རྒྱས་ཀྱི་བསྟན་པ་ལ་ཇི་ལྟར་ཞུགས་པའི་ཚུལ། ཞུགས་ནས་དགེ་བའི་བཤེས་གཉེན་ཇི་ལྟར་བསྟེན་པའི་ཚུལ། དེ་ལྟར་བསྟེན་པས་མཁས་བཙུན་བཟང་གསུམ་གྱི་ཡོན་ཏན་ཇི་ལྟར་བརྙེས་པའི་ཚུལ། བརྙེས་ནས་མཁས་པའི་བྱ་བ་གསུམ་གྱིས་རྒྱལ་བའི་བསྟན་པ་ལ་བགྱི་བ་མཛད་པའི་ཚུལ་ལོ༎
1.2.1
སྐུ་སྐྱེ་བ་ཇི་ལྟར་བཞེས་པའི་ཚུལ།
དང་པོ་ནི།
ངང་པའི་སྡེ་དཔོན་པད་མཚོ་དང༎
ཉིན་མོར་བྱེད་པ་མཁའ་ལ་བཞིན༎
སྙིང་རྗེའི་བདག་ཉིད་ཅན་རྣམས་ཀྱང༎
མཐོ་དང་གཙང་བའི་རིགས་སུ་འཁྲུངས༎
ཅེས་བྱ་བ་འདི་ལ་བདག་ཉིད་ཆེན་པོ་འདིའི་འཁྲུངས་ཡུལ་ནི། སྤྲུལ་པའི་ལོ་ཙྪ་བ་བཻ་རོ་ཙ་ནས་དུས་ཡུན་རིང་པོར་བཞུགས་ཤིང་བྱིན་གྱིས་བརླབས་པའི་ས། ཤར་རྒྱལ་མོ་དངུལ་ཆུའི་འགྲམ་གྱི་ཡུལ་ལྗོངས་དགེ་མཚན་དང་ལྡན་པ་ཞིག་གོ༎
རིགས་ནི་རུས་ཆེན་སྒྭ་ཞེས་པའོ༎
ཡབ་ནི་བོནཐོན་ཐེག་པ་རིམ་པ་དགུ་ལ་མཁས་པར་སྦྱངས་ཤིང་རྫུ་འཕྲུལ་སྟོན་ནུས་པ། གེ་གོད་རྒྱལ་པོ་ཞེས་པའོ༎
ཡུམ་ནི་བྱང་ཆུབ་ཀྱི་སེམས་ཐུགས་རྒྱུད་ལ་འཁྲུངས་པ་རྒྱ་གར་སྨན་ཞེས་པའོ༎
མེ་ཕོ་རྟའི་ལོ་ལ་ལྟས་ཁྱད་པར་ཅན་དང་བཅས་ཏེ་