[A:306]ཡུམ་གྱི་ལྷུམས་སུ་ཞུགས་ཤིང། མེ་མོ་ལུག་གི་ལོ་ལ་ངོ་མཚར་བའི་དགེ་མཚན་དུ་མ་དང་བཅས་ཏེ་འཁྲུངས་པས་ཀུན་ངོ་མཚར་བར་གྱུར་ནས་མཆེད་གསུམ་ཡོད་ཀྱང་བླ་མར་འོས་པ་ནི། བར་པ་འདིའོ་ཞེས་ཟེར་ཞིང། ཡབ་ཀྱི་ཆོས་ལུགས་ལ་མཁས་པར་ལེན་དུ་བཅུག་སྟེ། མཚན་ཤེས་རབ་འོད་ཟེར་ཞེས་བྱ་བར་བཏགས་སོ༎
སྔོན་ནས་བླ་མ་ཆེན་པོའི་རིགས་རྒྱུད་ཡིན་པས། ཡུལ་ལྗོངས་དེའི་སྐྱེ་བོ་ཀུན་གྱིས་ཕྱག་བྱེད་ཅིང་བླ་མར་འཁུར་ལ། ལུགས་དེ་ལ་བརྟེན་པའི་འཆད་རྩོད་རྩོམ་གསུམ་གྱི་བྱ་བ་ཡང་མང་དུ་མཛད་དོ༎
1.2.2
སངས་རྒྱས་ཀྱི་བསྟན་པ་ལ་ཇི་ལྟར་ཞུགས་པའི་ཚུལ།
གཉིས་པ་ནི། དེ་ནས་དགུང་ལོ་བཅྭ་བརྒྱད་བཞེས་པའི་ཚེ། འཁོར་བ་མཐའ་དག་དུག་གི་རྒྱ་མཚོ་ཆེན་པོ་ལྟ་བུར་གཟིགས་ཏེ། མཐའ་ཡས་པའི་སེམས་ཅན་གྱི་དོན་དུ་ཐམས་ཅད་མཁྱེན་པའི་གོ་འཕང་ལ་དམིགས་པའི་ཐུགས་ཁྱད་པར་འཁྲུངས་ནས། དཔལ་གསང་ཕུ་ནེའུ་ཐོག་གི་ཆོས་གྲྭ་ཆེན་པོར་ཕྱག་ཕེབས་སོ༎
དེའི་ཚེ་གླིང་སྟོད་ཀྱི་གདན་ས་བ་སེམས་དཔའ་ཆེན་པོ་རིན་ཆེན་རྣམ་རྒྱལ་གྱི་དྲུང་དུ། བྱང་ས་ནས་གསུངས་པའི་ཆོ་གས་བྱང་ཆུབ་སེམས་དཔའི་ཚུལ་ཁྲིམས་ཡང་དག་པར་བཟུང་ཞིང། མཁས་པའི་དབང་པོ་རྐོང་སྟོན་བློ་གྲོས་དབང་ཕྱུག་གི་དྲུང་དུ། མངོན་པར་རྟོགས་པའི་རྒྱན་འགྲེལ་པ་དང་བཅས་པ་དང། ཚད་མ་རྣམ་པར་ངེས་པ་དང། རིགས་པའི་ཐིགས་པ་སོགས་གསུང་རབ་མང་དུ་གསན་ཅིང། ཤིན་ཏུ་མཁས་པར་གྱུར་ནས། དགུང་ལོ་ཉི་ཤུ་རྩ་གཉིས་པའི་ཚེ་ཚད་མ་རྣམ་པར་ངེས་པའི་ཊཱི་ཀ་མཛད་ཅིང། དུས་དེ་ཉིད་ནས་བཟུང་སློབ་མ་ཤེས་རབ་ཅན་མང་པོ་ལ་བཤད་ཉན་གྱི་དབུ་གཙུགས་ཏེ། སློབ་དཔོན་རོང་སྟོན་ཞེས་སྙན་པའི་གྲགས་པས་སའི་སྟེང་མ་ལུས་པར་ཁྱབ་པར་མཛད་པ་ཡིན་ནོ༎
དེའི་ཚེ་འཕན་ཡུལ་མཐོང་སྨོན་གྱི་གཙུག་ལག་ཁང་དུ། དཔལ་གྲོ་སའི་མཁན་པོ་ཆེན་པོ་མཁས་བཙུན་ཀུན་དགའ་རྒྱལ་པོས་རབ་ཏུ་བྱུང་བ་དང་