[A:305]mdzad par gsan cing len par mdzad do//
1.1.3
de gnyis ka mi 'gal ba'i rgyu mtshan/
gsum pa ni/ bdag nyid chen po 'di'i sngon gyi lo rgyus mi 'dra ba gsum byung yang 'gal ba ma yin te/ kA ma la zhi la dang/ rje btsun dam pa rgya gar thugs rgyud gcig pa'i tshul ni dam pa sangs rgyas kyi rnam par thar pa las 'byung la/ lo tstsha ba rin chen mchog dang/ kA ma la zhi la dus mnyam du byon kyang sprul pas 'gro don so sor mdzad pa la 'gal ba med do//
de dag la 'di skad ces bya ste/
mkhas pa'i dbang po padma'i ngang tshul dang//
grub pa'i dbang phyug rje btsun rgya gar zhabs//
sprul pa'i lo tsa rin chen mchog gsum po//
bdag nyid chen po'i sngon gyi lo rgyus yin//
ces sbyar ba yin no//
1.2
sku tshe 'di'i rnam par thar pa rgyas par bshad pa/
gnyis pa la/ sku skye ba ji ltar bzhes pa'i tshul/ de nas sangs rgyas kyi bstan pa la ji ltar zhugs pa'i tshul/ zhugs nas dge ba'i bshes gnyen ji ltar bsten pa'i tshul/ de ltar bsten pas mkhas btsun bzang gsum gyi yon tan ji ltar brnyes pa'i tshul/ brnyes nas mkhas pa'i bya ba gsum gyis rgyal ba'i bstan pa la bgyi ba mdzad pa'i tshul lo//
1.2.1
sku skye ba ji ltar bzhes pa'i tshul/
dang po ni/
ngang pa'i sde dpon pad mtsho dang//
nyin mor byed pa mkha' la bzhin//
snying rje'i bdag nyid can rnams kyang//
mtho dang gtsang ba'i rigs su 'khrungs//
ces bya ba 'di la bdag nyid chen po 'di'i 'khrungs yul ni/ sprul pa'i lo tstsha ba bai ro tsa nas dus yun ring por bzhugs shing byin gyis brlabs pa'i sa/ shar rgyal mo dngul chu'i 'gram gyi yul ljongs dge mtshan dang ldan pa zhig go//
rigs ni rus chen sgwa zhes pa'o//
yab ni bonthon theg pa rim pa dgu la mkhas par sbyangs shing rdzu 'phrul ston nus pa/ ge god rgyal po zhes pa'o//
yum ni byang chub kyi sems thugs rgyud la 'khrungs pa rgya gar sman zhes pa'o//
me pho rta'i lo la ltas khyad par can dang bcas te