[A:373]པར་ཤོག་ཅིག་ཅེས་གསུང་ཞིང། ངེས་ཀྱང་དེ་ལ་མོས་གུས་བྱས་ན་དེ་ཁོ་ན་འབྱུང་བར་མངོན་སུམ་གྱིས་གྲུབ་པའི་ལོ་རྒྱུས་མང་པོ་དང། དུག་ནད་བྱུང་བ་རྣམས་ལ་དུག་སོས་པར་གྱུར་ཅིག་ཅེས་པའི་ཚིག་རྗེན་པ་དེ་ཉིད་ལན་བདུན་ཆུ་ལ་བཏབ་ནས་བྱིན་པས་དུག་ནད་ལས་གྲོལ་བ་མང་པོ་དང། དེ་བཞིན་དུ་མིག་དང། སོ་དང། ལག་པ་ལ་སོགས་པ་གང་ན་བ་ལ་དེ་མེད་པར་གྱུར་ཅིག་ཅེས་གསུང་ནས་བསྲུང་སྐུད་བཏགས་པས་དེ་མ་ཐག་ཏུ་ནད་ལས་གྲོལ་བར་མཐོང་ངོ༎
དཔེར་མཚོན་ན་མུས་པའི་དགེ་སློང་བློ་རིན་ཞེས་པ་མོས་གུས་ཅན་ཞིག་གིས་བྱིན་རླབས་ཞུས་པས་ཐུགས་སྤྲོ་བཞེངས་པ་ལྟར་མཛད་དེ། ཕྱག་འཁར་གྱིས་རོ་སྟོད་ལ་ལན་གསུམ་བྲབས་བྱུང་པས། འཁྲུགས་ཀྱི་ནད་གཞི་ཆེན་པོ་ལོ་དུ་མའི་བར་དུ་ན་བ་ཞིག་ཡོད་པ་དེ་ལས་གྲོལ་ལོ་ཞེས་ཁོང་རང་གསུང་བ་དང། ཤེལ་གྲོང་པའི་དཔོན་པོ་རྡོ་ར་ཞེས་པས་ན་བཟའ་ཕུལ་ནས། བུ་འབྱུང་བའི་བདེན་ཚིག་ཞུས་པས་དེ་ཁོ་ན་ལྟར་བྱུང་བ་དང། ནཱ་ལེནྟྲཱར་ཆོས་གསུང་བའི་བཞུགས་གདན་གྱི་སྟེང་དུ། རྒྱུན་དུ་སྡོད་པའི་ཁྱི་གུ་གཅིག་ཡོད་པ་དེ་ལ་དུས་གཅིག་གི་ཚེ། ཐུགས་སྤྲོ་བཞེངས་ནས་ཕྱག་གིས་བསྣུན་པས། ཆོས་མ་གྲོལ་གྱི་བར་དུ་ཤི། བཞུགས་གདན་ལ་བཞེངས་ལ་ཁད་པའི་ཚེ། ཕུ་ཕུ་ཟེར་བ་གསུམ་དང། ཞལ་གྱི་མཆིལ་མ་གཅིག་བཏབ་པས་ཁོ་ཡང་ལངས་ནས་སོང་བ་སོགས་བརྗོད་ཀྱིས་མི་ལང་ངོ༎
ཡང་དགུང་ལོ་བདུན་ཅུ་དོན་ལྔ་པ་ལ། ཤེལ་གྲོང་གི་གཙུག་ལག་ཁང་དུ་མིག་མཁན་དཀའ་བཞི་པས་གསེར་གྱི་ཐུར་མས་སྤྱན་ཕྱེ་བའི་ཚེ། མཉམ་གཞག་ཐུན་གཅིག་ལ་མཉམ་པར་བཞག་པས། གཞན་གྱིས་ཕྱག་ནས་འཛིན་དགོས་པ་ལ་སོགས་པའི་བྲེལ་བ་གང་ཡང་མ་བྱུང་ཞིང། མིག་མཁན་གྱིས་ཐུར་མ་ཧྲིལ་གྱིས་བསྒྲིལ་བའི་ཚེ། སྔོན་