[A:372]གི་བར་དུ་ཡང། ལྷ་དེ་གཉིས་ཀྱི་སྐུ་བཀྲག་དང་གཟི་མདངས་ཤིན་དུ་ཆེ། རྡུལ་མི་ཆགས། ངོ་སྐལ་གྱི་མར་མེ་ཕུལ་བའི་ཚེ་འཛིན་གྱིན་སྣང་བ་ནི་མངོན་སུམ་གྱིས་གྲུབ་པོ༎
ཡང་རོང་ངུར་མིག་ན་བཞུགས་པའི་ཚེ། མཆོད་རྟེན་ཆེན་པོ་ཞིག་གི་ནང་ན་དེ་དུས་ཀྱི་མི་སུ་ལ་ཡང་རྒྱུས་མེད་པར་རྗེ་བཙུན་བྱམས་པའི་སྐུ་གཅིག་ལ་ཆུའི་ཐིགས་པས་འོ་བརྒྱལ་གྱིན་ཡོད་པར་གཟིགས་ནས། ཞིག་གསོས་མཛད་པས་མངོན་ཤེས་མང་བར་ཀུན་ལ་གྲགས་པ་དང། ཡང་གསང་ཕུའི་ནང་གི་མི་གཡོ་ཕུག་པ་དང། འཇམ་དབྱངས་ཕུག་པར་རེ་མོས་ཀྱི་བཞུགས་པའི་ཚེ། ལྷག་པའི་ལྷ་དེ་གཉིས་ཀྱི་ཞལ་མཐོང་ཞིང་ཐུགས་རྒྱུད་ལ་ཐིམ་པའི་སྣང་བ་བྱུང་བ་ཡིན་ཞེས་བུ་སློབ་ཀུན་ལ་གྲགས་པ་དང། ཁོ་བོས་ཀྱང་མཁན་ཆེན་རིན་པོ་ཆེས་ནི་ལྷག་པའི་ལྷ་མང་པོའི་ཞལ་གཟིགས་འདུག། ཆོས་རྗེའི་ཞལ་སྔ་ནས་ཀྱང་གཟིགས་ལགས་སམ་ཅེས་ཞུས་པས། སྐྱེ་མེད་ཀྱི་དོན་རྟོགས་ན་ལྷག་པའི་ལྷས་ཞལ་སྟོན་པ་ཡིན། དེའི་ཚེ་ན་ལྷ་ལ་མང་ཉུང་མེད། བཟང་ངན་ནི་རང་རེའི་རྟོགས་པ་མཐོ་བ་ཙམ་གྱི་ལྷ་བཟང་དུ་འགྲོ་བ་ཡིན། རང་རེ་ལ་སྟོང་ཉིད་ཀྱི་ལྟ་བ་མེད་ན་ལྷ་མཐོང་ཡང་བཟང་པོ་ཡིན་པའི་ངེས་པ་མེད་ཅེས་གསུང་ངོ༎
ཡང་ནཱ་ལེན་དྲཱར་ཐོ་རངས་ཀྱི་དུས་ཞིག་ཏུ་ཁ་ཆེ་པཎ་ཆེན་དངོས་སུ་བྱོན་ནས། བདེ་མཆོག་དཀར་པོའི་བྱིན་རླབས་དང་ཚེ་བསྒྲུབ་གནང། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་ཀྱི་གླེགས་བམ་དབུ་ཐོག་ཏུ་བཞག་ནས་བྱིན་གྱིས་བརླབས་སོ་ཞེས་ཐུགས་ཀྱི་སྲས་དམ་པར་གྱུར་པ་སློབ་དཔོན་ནམ་མཁའ་དཔལ་ལྡན་ལ་གསུངས་སོ༎
རྟེན་འབྲེལ་ལ་དབང་འབྱོར་པའི་ཚུལ་ནི། བུ་དང་ནོར་མེད་པ་རྣམས་ལ་ཁྱོད་ལ་བུ་སྐྱེ་བར་གྱུར་ཅིག། ནོར་ཕྱུག་པོ་འོངས་