[A:356]འབྱུང་མེད། ཇོ་བོ་ཤཱཀྱ་མུ་ནེའི་དྲུང་དུ། སྡེ་སྣོད་ཤེས་པའི་དགེ་འདུན་མང་པོ་ལ་བསྙེན་བཀུར་བྱས་ན་འགྲུབ། དུས་དེར་ཁོ་བོ་སྤྱན་དྲོངས། ཆོས་ཀྱི་འཁོར་ལོ་བསྐོར། མིང་ལ་སྨོན་ལམ་མ་ཟེར་ཆོས་འཁོར་གྱིས་ཅེས་གསུང། རྗེ་ཉིད་ཀྱིས་ཇི་ལྟར་གསུངས་པ་བཞིན་ཀུན་སྤངས་པས་ཀྱང་ཕྱག་ལེན་ལ་བཀལ། དེའི་ཚེ་རྗེ་ཉིད་སྤྱན་འདྲེན་པ་ནི་ས་ཕྱོགས་དེའི་ཡོན་བདག་གི་གཞན་དབང་དུ་གྱུར་ནས་མ་གྲུབ། ཆོས་ཀྱི་འཁོར་ལོ་བསྐོར་བའི་མཚོནམཆོན་བྱེད་དུ། བཀའ་འགྱུར་དང། བསྟན་འགྱུར་ཚར་དྲུག་བསྒྲགས་སོ༎
དེ་དུས་ཀྱི་སྐུ་སྐལ་ལ་དམིགས་ཏེ། ནཱ་ལེནྚཱའི་གཙུག་ལག་ཁང་དུ་ཇོ་བོའོ་ཡི་སྐུ་ཚད་བཞེངས། དགེ་འདུན་ལ་ཚོགས་ཟངས་ཆེན་མོ་ཕུལ། དབྱར་ཆོས་ལ་རིགས་ར་གཙུགས་སོ༎
དེ་དག་ལ་འདི་སྐད་ཅེས།
ཆགས་དང་སྡང་བའི་དཔུང་ཚོགས་བཞི་བཤམས་ཤིང༎
ཕ་རོལ་ཕྲག་དོག་དྲག་པོས་སུན་འབྱིན་པའི༎
རྩུབ་འགྱུར་ཚལ་དུ་མགོན་ཁྱོད་མི་བཞུགས་ཀྱང༎
གོང་མས་ལུང་བསྟན་དགའ་བའི་ཚལ་འདི་རྙེད༎
བུ་སློབ་མང་པོའི་འཁོར་ཡུག་ཡངས་པའི་དབུས༎
རྟོགས་པའི་རླབས་ཕྲེང་གོང་ནས་གོང་འཕེལ་ཞིང༎
སྲིད་ཞིའི་རྒུད་པ་སེལ་བའི་འབབ་ངོགས་མཆོག༎
ཆོས་ཀྱི་རྒྱ་མཚོ་དཔལ་ལྡན་ནཱ་ལེནྚཱར༎
བརྩེ་ཆེན་ཁྱོད་ཀྱིས་མཁྱེན་པའི་ཡོན་ཏན་གྱིས༎
འཇིག་རྟེན་རྒུད་པ་མ་ལུས་རབ་བསལ་ནས༎
བསྟན་པའི་ཆུ་ཆེན་བརྒྱ་ཕྲག་ཁྱོད་ཀྱིས་ཕབ༎
མཐུ་སྟོབས་དཔུང་གིས་དྲག་པོའི་ཁེངས་པ་འཕྲོག༎
དེ་ཡང་འདི་ལྟར་བདག་ཉིད་ཆེན་པོ་འདི་ལ་ནུས་པའི་ཡོན་ཏན་བསམ་གྱིས་མི་ཁྱབ་པ་མངའ་བ་ནི། སྤྱིར་བདེན་པའི་ཚིག་མཐའ་དག་འགྲུབ། བསྟན་པ་སུན་འབྱིན་པར་བྱེད་པའི་དགྲ་བོ་དག་ལ་སྨོད་པ་ཅུང་ཟད་ཙམ་མཛད་ནའང་དེ་ལ་མི་འདོད་པ་མང་པོ་ཐོག་ཏུ་འབྱུང། སྤྱིར་ཆོས་སྐྱོང་ཐམས་ཅད་བྲན་བཞིན་འཁོལ།