[A:355]ཕྱག་ཏུ་བླུགས་མང་ཇ་དེ་ལ་བྱེད་པ་ཡིན། སྡེར་མ་ཅིག་ཁྱེར་ལ་ཤོག། ཆོས་རྗེ་ཁྱོད་ལ་མངོན་ཤེས་ཡོད་ན་སྡེར་མའི་ནང་དུ་ཅི་འདྲེན་པ་འདུག་ཅེས་ཟེར། རྗེ་ཉིད་ཀྱི་ཞལ་ནས་བུ་རམ་རྡོག་མ་ཁ་ཡར་གཅིག་ཨེ་ཡོད་ཡིན་གསུང། ཇི་སྐད་གསུང་བ་བཞིན་བུ་རམ་སྡེར་གང་ཕུལ་ནས་འདི་སྐད་ཅེས་ཇ་ཕོར་པ་གང་གིས་མང་ཇ་འགྲུབ་པ་ཡ་མཚན་མི་ཆེ་འམ། ཆོས་རྗེ་ཁྱོད་རང་གི་བུ་རམ་སྡེར་མ་གང་པོ་དེས་དགེ་འདུན་ཐམས་ཅད་ལ་རེ་རེ་ཁྱེད་ན། ཆོས་རྗེ་ཁྱེད་ཕོ་སྐྱེས་ཡིན་ཅེས་ཟེར། རྗེའི་ཞལ་ནས་འོ་ན་ཐམས་ཅད་ལ་བྲིམས་ཤིག་ཅེས་གསུང། དེ་ནས་ཁམས་པ་དགེ་བཤེས་གཅིག་གིས་བྲིམས་པས་བུ་རམ་རྡོག་པོ་ཉི་ཤུ་ཙམ་གྱི་བོང་ཚོད་ཅིག་ཡོད་པ་ལ་དགེ་འདུན་ལྔ་བརྒྱ་ཙམ་ཐམས་ཅད་ལ་རྡོག་པོ་རེ་རེ་ཁྱེད་པར་བྱུང། རྗེའི་ཞལ་ནས། དེ་བས་དེ་ངོ་མཚར་མི་ཆེ་འམ་གསུང་བས་ལྕགས་ཟམ་པ་ན་རེ། འོ་ན་ངས་རྒྱ་ནག་རི་བོ་རྩེ་ལྔ་འཁོར་རམ་མི་འཁོར། ཉག་ཆུ་ལ་ལྕགས་ཟམ་ཚུགས་སམ་མི་ཚུགས་ཞེས་ཟེར་ཞེས། སྔོན་ལྷ་སའི་ལྕགས་ཟམ་འཛུགས་པའི་དུས་སུ་རྗེ་ཉིད་གསང་ཕུ་ན་བཞུགས་པའི་ཚེ། ལུང་བསྟན་ཞུས་པ་ཐོག་ཏུ་ཁེལ་བས་ཡིད་ཆེས་པར་སྣང་ཞིང། དུས་འདིར་ཡང་ལྕགས་ཟམ་པ་སྤྱིར་ཁང་པའི་ནང་དུ་མི་འབྱོན་པ་ཡིན་པ་ལ། དེའི་ཉིན་གཟིམ་ཁང་དུ་བྱོན། དཔོན་སློབ་གཉིས་པོ་ལྐོག་ཏུ་ཞུས་ལན་འགའ་ཞིག་མཛད་ནས་ཐེགས་སོ༎ ཞེས་ཉེ་བར་གནས་པ་དག་གསུང་ངོ༎
ཡང་གོན་གྱོ་ཀུན་སྤངས་པ་ནི། རྗེ་ཉིད་ལ་གདམས་པ་ཁྱད་པར་ཅན་མང་དུ་ཞུས་ཤིང། དད་པ་ཐོབ་པའི་སློབ་མ་ཡིན་པས་ལུང་བསྟན་ཞུས་པ་ནི། ང་ཇོ་བོའོ་རིན་པོ་ཆེའི་དྲུང་དུ་སྨོན་ལམ་ཆེན་མོ༎ བློ་བཟང་གྲགས་པས་བྱས་པ་དེ་བས་ལྷག་པ་ཅིག་བྱེད་འདོད། འགྲུབ་བམ་མི་འགྲུབ་ཅེས་ཟེར། རྗེའི་ཞལ་ནས་སྨོན་ལམ་རྐྱང་པ་ལ་