[A:357]ཁྱད་པར་དམ་པ་སངས་རྒྱས་ཀྱི་ཆོས་སྐྱོང་ཨ་གྷོ་ར་དང། གཉན་གྱི་མགོན་པོས་ཐུན་མོང་གི་ལས་ཚོགས་ཐམས་ཅད་བསྒྲུབ། ཡུལ་གང་དུ་མི་མ་ཡིན་གྱི་གནོད་པ་བྱུང་བ་ན། རྗེ་ཉིད་ཀྱི་མཚན་ནས་བཏོན་པ་ཙམ་གྱིས་འབྱུང་པོ་རྣམས་མྱུར་དུ་འབྲོས། གསང་ཆབ་བཏུང་པ་ཙམ་གྱིས་གདོན་གྱིས་གཟིར་བ་རྣམས་མྱུར་དུ་གྲོལ། ཁྱད་པར་གསང་ཆབ་དེས་ནད་གང་ལ་ཡང་མི་ཕན་པ་མེད། ཁྱད་པར་ཀླུའི་ནད་ཀྱིས་གཟིར་བ་ལ་བྱིན་རླབས་དང་དམིགས་པ་ཅུང་ཟད་མཛད་པས་གྲོལ། དེའི་སྙན་གྲགས་ལ་བརྟེན་ནས་ཀླུ་ནད་ཅན་མང་པོ་གདམས་པ་ཞུ་བ་ལ་འོངས། དེ་དག་ལ་དེ་བཞིན་གཤེགས་པ་ཀླུ་དབང་རྒྱལ་པོའི་བསྒོམ་བཟླས་འབོགས་པར་མཛད། སེར་བ་དྲག་པོ་འབབ་པ་དང། ཕ་རོལ་པོ་འཁྲུག་པ་བྱེད་པ་མཐོང་ན་ཕཊ་ཀྱི་སྒྲ་གཅིག་མཛད་དེ་ཙམ་གྱི་ཞི་བར་འགྱུར་རོ༎
དེ་ལ་སོགས་པ་བརྗོད་པས་མི་ལང་ངོ༎
དེ་ལྟར་དགུང་ལོ་བརྒྱད་ཅུའི་མཐར་སོན་པའི་ཚེ། ལུང་བསྟན་གྱི་སྐུ་ཚེའི་ཚད་ཀྱང་མཐར་ཕྱིན། ཐུགས་དམ་གྱི་རྟོགས་པ་ཟབ་མོ་ཇི་ལྟར་དགོངས་པ་བཞིན་གྲུབ་ནས། མེ་མོ་ཡོས་ཀྱི་ལོ་དགུང་ལོ་བརྒྱད་ཅུ་རྩ་གཅིག་ལ་ཕེབས་པའི་ཚེ། ཉེ་གནས་ཆེན་མོས། རྗེ་ཉིད་ཀྱི་གསེར་སྐུ་རྩེ་ཁྲུ་གང་པ་གཅིག་བཞེངས། ཕྱག་ཏུ་ཕུལ་བས། འདི་ལ་ཁོ་བོ་ལོ་གསུམ་སྡོད་པའི་རྟེན་འབྲེལ་བྱེད། དེའི་རིང་ལ་བསྟན་བཅོས་མང་པོ་འཆད། རྩོམ་པ་ཡང་མང་པོ་བྱེད། ཡུམ་རྒྱས་པ་དང། དེའི་ཊཱི་ཀ་རྔོག་ལོས་བྱས་པ་དང། སྙན་ངགས་ཀྱི་བསྟན་བཅོས་ཆེན་པོ་དཔག་བསམ་འཁྲིལ་ཤིང་ཡང། ནམ་མཁའ་དཔལ་ལྡན་གྱིས་ཉི་མའི་གུང་ལ་ལེགས་པར་ཐོན་ཅིག་ཅེས་གསུང།
དེ་ནས་ཡོས་ལོ་ཧྲིལ་པོ་དང། འབྲུག་གི་ལོའི་ཧོར་ཟླ་དང་པོ་ཙམ་ཡང་ཆད་ལ། ཆོས་ཚན་མི་གཅིག་པ་