[A:353]དུས་དེར། གོ་བོ་དང། ར་དམར་བ་ཆུ་འདྲེན་པའི་ཡུར་བ་ལ་མི་འཆམ་པའི་འཁྲུག་པ་ཆེན་པོ་འོང་གྲགས་འདུག་པ་ལ། རྗེ་ཉིད་ཀྱི་གཟིམ་ཁང་གི་སྟེང་ནས་ཕཊ་ཅེས་གསུངས་པས་འཁྲུག་པ་རང་ཞི་ལ་སོང་ཞེས་སློབ་དཔོན་རྒྱལ་བཟངས་པ་གསུང་ངོ༎
ཡང་མཁན་ཆེན་པདྨ་བཟང་པོ་མཇལ་བ་དང། ཁོང་པ་ཉིད་ཀྱིས་མཛད་པའི་དུས་འཁོར་ཊཱིཀ་ཆེན་གྱི་རབ་གནས་ཞུ་བ་ལ་བྱོན་པའི་དུས་སུ། དགེ་འདུན་ཚོགས་པས་བསུ་བ་མཛད། མེ་ཏོག་གི་ཆར་བབས། རྗེའི་ཞལ་ནས། མཁན་ཆེན་པ་ཁྱེད་ཀྱིས་བྱས་པའི་ཊཱི་ཀ་ལ་ནོར་པ་གསུམ་ཡོད་ཅེས་གསུངས། དེ་གང་ཡིན་ཞུས་པས་ཅི་ཡང་མི་གསུང་མོད། ང་རང་གི་བློ་ལ་མི་བདེ་བ་གསུམ་ཡོད་པ་དང་འཐུན་པར་བྱུང་བས། རྗེ་ཉིད་ལ་མངོན་ཤེས་མངའ་བ་ལ་རྩོད་པ་མེད་ཅེས་གསུངས།
ཡང་ཁམས་ནས་སློབ་དཔོན་རིན་ཆེན་བློ་གྲོས་རྗེ་ཉིད་མཇལ་བ་ལ་ཕེབས་པའི་ཚེ། རྗེའི་ཞལ་ནས་ཁྱེད་ཀྱིས་ཇ་གང་བཟང་བ་ཐམས་ཅད་ངེད་ལ་ཕུལ་ཅིག། དཀར་ཡོལ་གྱི་ནག་ལ་ནང་དཀར་བ་དེ་ཡང་ཕུལ་ཅིག་ཞེས་གསུང། བདག་ལོ་གསུམ་དབུས་གཙང་དུ་ཆོས་སྔར་མ་ཐོབ་པ་རྣམས་ཉན་པ་ལ་འོངས་པ་ཡིན་པས། ཇ་བཟང་པོ་གང་ཡོད་ཕུལ་བས་མི་ཡོང་ལགས། དཀར་ཡོལ་དེ་འདྲ་ནི་ཡེ་རང་མེད་ལགས། ཞེས་ཞུས་པས། ཁྱེད་ལོ་འདི་མ་འཁོར་བར་ཁམས་ལ་འགྲོ་བར་འདུག་ཅེས་གསུངས། ཕྱིས་གསང་ཕུར་ཇ་འགྱེད་བྱས་པའི་དུས་སུ། ཇ་སིགས་ཅིག་གི་སྐེད་པ་བཅད་པས། དཀར་ཡོལ་དེ་བྱུང་པ། རྗེ་ཉིད་ལ་ཕུལ་ལོ༎
རྐྱེན་དགོས་འགའ་ཞིག་གི་དབང་གིས་ཁམས་ལ་ཐེགས་པ་ཡང་དེ་བཞིན་ཁོ་ནར་བྱུང་ངོ་ཞེས་ཁོང་པ་ཉིད་གསུང་ངོ༎
ཡང་ལྷ་