[A:342]ལུང་མང་པོ་དྲངས་ནས་དབུ་སེམས་དང། མདོ་སྔགས་ཀྱི་གྲུབ་པའི་མཐའ་སྔོན་ཆད་མ་གྲགས་པའི་རྣམ་གྲངས་ཆེས་ཤིན་དུ་མང་པོ་དག་འཇོག་པར་མཛད་དོ༎
དེ་ཡང་ལྷག་པའི་ལྷས་དངོས་སུ་ལུང་བསྟན་པའི་གྲུབ་པའི་མཐའ་ཡིན་པར་ཁས་ལེན་ནོ༎
དེའི་སྐབས་སུ། གངས་ཅན་གྱི་བཤད་རྒྱུད་པ་དང་སྒྲུབ་རྒྱུད་པ་དག་ཕལ་ཆེར་རང་རང་གི་རྩ་བའི་རྒྱུད་པ་ལ་ཡོད་པའི་ལྟ་བསྒོམ་སྤྱོད་འབྲས་ཀྱི་རྣམ་པར་བཞག་པ་ཐམས་ཅད་འཁྲུལ་པ་ཡིན་པར་ཁས་བླངས་ནས་ལུགས་འདིའི་རྗེས་སུ་འབྲང་བ་ལ་ཐེ་ཚོམ་ཙམ་ཡང་མེད་པར་ཞུགས་སོ༎
དེའི་ཚེ་བདག་ཉིད་ཆེན་པོ་འདིས་ནི། ལུགས་དེ་ལ་སྙིང་པོ་ཅུང་ཟད་ཀྱང་མེད་པར་གཟིགས་ཤིང། གྲུབ་པའི་མཐའ་དེ་དག་ནི་ལྷག་པའི་ལྷ་མིན་པས་བྱིན་གྱིས་བརླབས་པར་གཟིགས་ནས། ལུང་དང་རིགས་པས་སུན་འབྱིན་པའི་བསྟན་བཅོས་མང་དུ་མཛད་ཅིང། སྔོན་བྱོན་པའི་གངས་ཅན་གྱི་མཁས་པ་ཆེན་པོ་རྣམས་དང། གྲུབ་ཆེན་རྣམས་ཀྱིས་གཤེགས་པའི་ཤུལ་དེ་ཉིད་རྨ་མེད་པར་གཟིགས་ནས། དེ་དག་གི་གཞུང་སྲོང་བར་མཛད་དོ༎
དེའི་རྗེས་སུ་སྐལ་བ་དང་ལྡན་པ་འགའ་ཞིག་གིས་ཞུགས་པས་དིང་སང་གངས་ཅན་གྱི་ལྗོངས་འདིར་ཆོས་ལུགས་གཉིས་བྱུང་བར་གྱུར་ཏོ༎
དེ་ལྟར་མཛད་པ་དེ་ནི་ལུགས་དེ་ལ་སྡང་བ་ཙམ་དུ་ཟད་དོ་སྙམ་ན། དེ་ཡང་མ་ཡིན་ཏེ། གངས་ཅན་འདིར་རྒྱུད་པ་རྣམ་པར་དག་པ་ལས་བྱུང་བའི་ཆོས་ལུགས་མི་འདྲ་བ་བདུན་ཙམ་ཞིག་སྣང་བ་དེ་ནི། སྔོན་གྱི་མཁས་གྲུབ་དམ་པ་རྩོད་པ་དང་བྲལ་བ་རྣམས་ཀྱིས་གཤེགས་པའི་ཤུལ་རྣམ་པར་དག་པ་ཁོ་ནར་སྣང་ལ་ལུགས་གསར་པ་འདི་ལ་ནི་ཁུངས་ཐུབ་ཀྱི་རྒྱུད་པ་མི་སྣང་ཞིང། གྲུབ་པའི་མཐའ་རྣམས་ལུང་རིགས་དང་འགལ་བའི་ཕྱིར། དེ་བས་ན་ལུགས་དེ་སུན་འབྱིན་པར་ནུས་པ་ནི། བདག་ཉིད་ཆེན་པོ་འདིའི་སྔ་རོལ་དུ་སུ་ཡང་བྱུང་བ་མེད་དོ༎