[A:343]དེ་ལ་འདི་སྐད་ཅེས།
མེ་ཏོག་གཞུ་ཅན་གྱིས་བརྩོན་འགྲོ་བ་འདི༎
ལུས་མེད་ཀྱིས་སྤྲུལ་ལྷ་གཞོན་གྱིས་བསླུས་ནས༎
པ་སངས་སློབ་མའི་ལམ་དུ་སོང་བ་ན༎
ཡིད་བསྲུབས་འཆིང་བྱེད་དྲང་སྲོང་འདི་འཁྲུངས་སོ༎
1.2.5.2.2
རྒོལ་བ་གཞན་དང་དངོས་སུ་ཐུག་པའི་རྩོད་པ།
གཉིས་པ་རྒོལ་བ་གཞན་དང་ཐུག་པའི་རྩོད་པ་ནི་གཉིས་ཏེ། 1.2.5.2.2.1
རང་ཕྱོགས་བསྒྲུབ་པའི་ཚུལ་དང། 1.2.5.2.2.2
གཞན་ཕྱོགས་སུན་ཕྱུང་བའི་ཚུལ་ལོ༎
1.2.5.2.2.1
རང་ཕྱོགས་བསྒྲུབ་པའི་ཚུལ།
དང་པོ་ནི། གསང་ཕུ་ནེའུ་ཐོག་གི་གཙུག་ལག་ཁང་དུ་ཕར་ཚད་བསྡུས་གསུམ་གྱི་རང་ལུགས་ཀྱི་གྲུབ་པའི་མཐའ་ལ་སྒྲུབ་བྱེད་ཡང་དག་བཀོད་པས། ལོ་དུ་མའི་བར་དུ་ཆོས་ཐོག་རེ་རེ་ཞིང་དགེ་འདུན་ཚོགས་པ་རྒྱ་མཚོ་ལྟ་བུའི་དབུས་སུ་རྩོད་པའི་ཁྱུ་མཆོག་ཏུ་གྲགས་པ་རྣམས་ཀྱིས་ལན་བརྒྱར་བརྩད་ཀྱང་རྒོལ་བ་འདིས་རིགས་པ་འདི་ལྟ་བུ་ཞིག་སོང་ངོ༎ ཞེས་གཏམ་དུ་གླེང་བ་ཅིག་ཀྱང་མེད་དོ༎
1.2.5.2.2.2
གཞན་ཕྱོགས་སུན་ཕྱུང་བའི་ཚུལ།
གཉིས་པ་ནི། ཡུལ་དབུས་ཀྱི་པོ་ཏ་ལར་རིན་པོ་ཆེ་བློ་བཟང་དང་མཇལ། ཤེར་ཕྱིན་གྱི་ལམ་རིམ་ལས་བརྩམས་པའི་འབེལ་གཏམ་མཛད་པས། རིན་པོ་ཆེ་པས་མངོན་པར་རྟོགས་པའི་རྒྱན་ཤེར་ཕྱིན་གྱི་ལམ་རིམ་མ་ཡིན་པར་ཞལ་གྱིས་བཞེས་དགོས་བྱུང་བས། སྤོབས་པ་ཕྲོགས་ལ། འོན་ཀྱང་ཐུགས་གཟུ་བས་རྗེས་སུ་ཡི་རང་བར་མཛད་ཅིང། གན་གོས་ལྕགས་ནག་ཡུག་གཅིག་འབུལ་བར་མཛད་དོ་ཞེས་སློབ་དཔོན་བཟད་པ་བློ་རྒྱམ་པ་གསུང་ངོ༎
བོ་དོང་དུ་པཎ་ཆེན་བློ་བརྟན་བཞི་པ་དང་འདུལ་བའི་མ་བྱིན་ལེན་གྱི་རིན་ཐང་གི་ཚད་ལ་རྩོད་པ་བྱས་པས། ལུང་མཚུངས་མཛད་པ་ན། རྗེ་ཉིད་ཀྱིས། ཀ་མ་ལ་ཤི་ལས་མཛད་པའི་དོན་བརྒྱད་མའི་ལུང་དྲངས། བློ་བརྟན་པས་ཧོར་རྒྱལ་པོའི་འཇའ་སའི་ལུང་དྲང་དགོས་པ་བྱུང་བས་སྤོབས་པ་ཕྲོགས་སོ་ཞེས་དེ་དུས་ཀྱི་གྲལ་ལ་འཁོད་པའི་རྒན་པོ་དག་གསུངས། གསང་ཕུར་ལྡན་མ་བློ་རྒྱམ་དང་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་མེད་ཀྱི་རྩོད་པ་བྱས་པས།