[A:342]lung mang po drangs nas dbu sems dang/ mdo sngags kyi grub pa'i mtha' sngon chad ma grags pa'i rnam grangs ches shin du mang po dag 'jog par mdzad do//
de yang lhag pa'i lhas dngos su lung bstan pa'i grub pa'i mtha' yin par khas len no//
de'i skabs su/ gangs can gyi bshad rgyud pa dang sgrub rgyud pa dag phal cher rang rang gi rtsa ba'i rgyud pa la yod pa'i lta bsgom spyod 'bras kyi rnam par bzhag pa thams cad 'khrul pa yin par khas blangs nas lugs 'di'i rjes su 'brang ba la the tshom tsam yang med par zhugs so//
de'i tshe bdag nyid chen po 'dis ni/ lugs de la snying po cung zad kyang med par gzigs shing/ grub pa'i mtha' de dag ni lhag pa'i lha min pas byin gyis brlabs par gzigs nas/ lung dang rigs pas sun 'byin pa'i bstan bcos mang du mdzad cing/ sngon byon pa'i gangs can gyi mkhas pa chen po rnams dang/ grub chen rnams kyis gshegs pa'i shul de nyid rma med par gzigs nas/ de dag gi gzhung srong bar mdzad do//
de'i rjes su skal ba dang ldan pa 'ga' zhig gis zhugs pas ding sang gangs can gyi ljongs 'dir chos lugs gnyis byung bar gyur to//
de ltar mdzad pa de ni lugs de la sdang ba tsam du zad do snyam na/ de yang ma yin te/ gangs can 'dir rgyud pa rnam par dag pa las byung ba'i chos lugs mi 'dra ba bdun tsam zhig snang ba de ni/ sngon gyi mkhas grub dam pa rtsod pa dang bral ba rnams kyis gshegs pa'i shul rnam par dag pa kho nar snang la lugs gsar pa 'di la ni khungs thub kyi rgyud pa mi snang zhing/ grub pa'i mtha' rnams lung rigs dang 'gal ba'i phyir/ de bas na lugs de sun 'byin par nus pa ni/ bdag nyid chen po 'di'i snga rol du su yang byung ba med do//