[A:327]མཁས་པའི་དབང་པོ་ཆོས་ལུང་དཀའ་བཅུ་པ་ཞེསཞས་གྲགས་པ་དེས་ཉེ་བར་གནས་པ་མཛད་ནས། སྐུ་ཚེའི་བསྒྲུབས་པ་ཞག་བདུན་པ་གཅིག་མཛད་པར་དམ་བཅས་ནས་མཚམས་བཅད་པའི་ཞག་ལྔ་པའི་མཚན་ལམ་ན། སློབ་དཔོན་ལེགས་ལྡན་འབྱེད་ཡིན་ཟེར་བའི་པཎྜི་ཏ་སྔོ་སངས་གཅིག་བྱོན་ནས། སྟོན་པའི་སྐུ་ཙན་དན་དཀར་པོ་ལས་གྲུབ་པ་ཁྲུ་གང་པ་གྲོང་ཁྱེར་དུ་གཤེགས་པའི་རྣམ་པ་ཅན་གཅིག་དང། རང་རྒྱུད་ཤར་བའི་སློབ་དཔོན་གསུམ་གྱིས་བྱས་པ་ཡིན་ཟེར་བའི་བསྟན་བཅོས་ཀྱི་གླེགས་བམ་གསུམ་དང་བཅས་པ། ས་འོག་ཞིག་ནས་བཏོན་ཏེ། རྗེ་ཉིད་ཀྱི་ཕྱག་ཏུ་གཏད་ནས། ཁྱེད་ཀྱིས་འདི་ཚགས་གྱིས་ལ་ཆུད་མ་ཟོས་པར་གྱིས། ཁྱེད་ཀྱི་ཚེའི་ཚད་ནི་བརྒྱད་བཅུ་ཐམ་པའོ༎ ཞེས་གསུང། དེ་ནས་དེ་མ་ཐག་ཏུ་སྐྱོར་མོ་ལུང་གི་ཆོས་གྲྭར་ཕེབས་ནས། མཁས་པ་ཡོན་ཏན་ཁྲིས་རྗེ་བཙུན་མི་གཡོ་བའི་བསྒྲུབ་པ་མཛད་པའི་ཁང་པ་དེ་རིན་པོ་ཆེ་སངས་རྒྱས་དཔལ་གྱིས་བཞུགས་ས་བྱས་པ་དེར། བདག་ཉིད་ཆེན་པོ་འདིས་རྗེ་བཙུན་གྱི་བསྒྲུབ་པ་ཅུང་ཟད་གཅིག་མཛད་པ་ན། མཚན་ལམ་དུ་ཁང་པ་དེའི་གནས་པོ་དེ་ན་རེ། ཁྱེད་ཀྱི་སློབ་དཔོན་གྱིས་ཞལ་མཐོང་བའི་ལྷ་དེ་འདི་ན་ཡོད་པ་ཡིན་ཞེས་ཟེར་ནས། འཇའ་འོད་ཀྱི་གུར་ཁྱིམ་མཛེས་པར་ཕུབ་པ་ཞིག་བསྟན་བྱུང་བ་རྨིས། དུས་དེ་ཉིད་ནས་བཟུང་སྟེ་སྤྱིར་གསུང་རབ་ཀྱི་ཚིག་དོན་ལ་ཐོགས་པ་མེད་པའི་བློ་གྲོས་དང། ཁྱད་པར་དབུ་མ་རང་རྒྱུད་ཀྱི་བསྟན་བཅོས་གང་གཟིགས་ཀྱང་ཐོགས་པ་མེད་པའི་བློ་གྲོས་དང། ཚིག་དོན་གཉིས་ཀ་ལ་མི་ཕྱེད་པའི་དད་པ་ཐོབ་པར་ཞལ་གྱིས་བཞེས་སོ་ཞེས་ཡིད་ཆེས་པའི་སློབ་དཔོན་གྱི་གསུང་ལས་ཐོས་སོ༎
ཡང་སློབ་དཔོན་ཟླ་བ་གྲགས་པས་མཛད་པའི་བསྟན་བཅོས་ཀྱི་དོན་གྱི་ཆ་ལ་མི་ལེགས་པ་མེད་ཀྱང། ཚིག་གི་ཆ་ལ་ཉེས་པ་མང་པོ་ཡོད་དོ་དེའི་འཐིང་སླད་