[A:328]ཅུང་ཟད་ཅུང་ཟད་མཛད་ཅིང། གཞན་དག་ལ་ཟུང་ཟ་བའི་ཆེད་དུ། ཀུ་རེ་དང་བཞད་གད་འགའ་ཞིག་མཛད་པའི་སྐབས་སུ། དེ་དང་མི་མཐུན་པའི་མཚན་ལམ་ཅུང་ཞིག་གཟིགས་པས། སློབ་དཔོན་དེའི་ཞབས་ལ་ལྷག་པར་དད་ཅིང། དེའི་གསུང་རབ་རྣམས་ལ་དགོངས་པ་འགྲེལ་བའི་བསྟན་བཅོས་ལྷག་པར་ཡང་མཛད་དོ༎
དེ་དུས་ཀྱི་མཚན་ལམ་དུ་བྱུང་བ་ནི། འདི་ལྟར།
དཔལ་ལྡན་ཟླ་བ་གྲགས་པ་ནི༎
སྟོབས་ལྡན་རྡོ་ཡི་སེང་གེ་ཞོན༎
དུ་རུ་ཁའི་དམག་བཟློག་ནས༎
ཞི་བསང་མེད་པ་ངོ་མཚར་ཆེ༎
དོན་དང་ཚིག་ལ་ཤིན་ཏུ་མཁས༎
ཞེས་ཟེར་མཁན་ཞིག་བྱུང་བར་སྣང་ངོ༎
ཞེས་ཡིད་ཆེས་པའི་སློབ་དཔོན་གྱི་གསུང་ལས་ཐོས་སོ༎
ཡང་སློབ་དཔོན་སེང་གེ་བཟང་པོ་ལ་དགག་པ་ཅུང་ཟད་མཛད་པ་ན། མཚན་ལམ་དུ། ཅིག་ན་རེ། སློབ་དཔོན་སེང་གེ་བཟང་པོ་ནི་ཡུམ་འཆད་པ་ལ་ཕུལ་དུ་ཕྱིན་པ་ཡིན་ནོ༎ སློབ་དཔོན་ཆོས་ཀྱི་བཤེས་གཉེན་གྱིས་ཀྱང་འདིའི་འགྲེལ་པ་ལ་འགྲེལ་བཤད་བྱས་སོ༎ ཞེས་ཟེར་བ་ཅིག་བྱུང། དེ་ནས་བཟུང་སྟེ་སློབ་དཔོན་དེ་ལ་དགག་པ་མི་འཛད་ཅིང། སློབ་དཔོན་ཆོས་བཤེས་ལ་ཐུགས་རྩིས་སུ་མཛད་དོ༎
ཡང་ཚད་མདོའི་རྣམ་བཤད་མཛད་པ་ན། བཅོམ་ལྡན་རིགས་པའི་རལ་གྲིས་ལེགས་སོ་བྱིན་པའི་མཚན་ལམ་དང། རྩ་བ་ཤེས་རབ་ཀྱི་ཊཱི་ཀ་མཛད་པ་ན་སློབ་དཔོན་ཕྱོགས་ཀྱི་གླང་པོ་ཡིས་ལེགས་སོ་བྱིན་པའི་མཚན་ལམ་དང། མངོན་པར་རྟོགས་པའི་རྒྱལ་ཡུམ་དྲུག་དང་སྦྱར་བའི་མདོ་སྦྱོར་མཛད་པ་ན། སྐུ་ཚེ་ཕྱི་མ་དགའ་ལྡན་དུ་གཤེགས་པའི་མཚན་ལམ་བྱུང་ཞིང། རྗེ་ཉིད་ཀྱི་ཐུགས་བརྩེ་བའི་སློབ་མ་རྣམས་ལ་རང་རེ་དཔོན་སློབ་དགའ་ལྡན་དུ་འགྲོ། མཁན་ཆེན་པ་ཡང་དགའ་ལྡན་ན་བཞུགས་ཤེས་གསུང་བར་ཡིད་ཆེས་པའི་ཉེ་གནས་ཀྱི་གསུང་ལས་ཐོས་པ་དང། གཙང་གི་སྒེ་བ་གདོང་དུ་ཕར་ཕྱིན་