[A:326]རིམ་པར་བརྒྱུས་ནས་སུན་རྩེན་གྱི༎
མདུན་སའི་སྐྱེད་ཚལ་རྒྱན་དུ་ཁྱེར༎
དེ་ཡི་རིན་དུ་ལྷ་རྫས་ཀྱི༎
མེ་ཏོག་གསར་པ་མ་གཏོར་རམ༎
ཁྱོད་ཀྱི་སྙན་གྲགས་ཨུ་ཏྤལ་ཕྲེང༎
ས་སྐྱོང་རྒྱལ་པོའི་རྣ་བར་ཕུལ༎
དེ་ཡི་ལན་དུ་ས་སྐྱོང་གི༎
དཀོན་ནོར་པད་ཕྲེང་ཁྱོད་ཀྱིས་བསྣམས༎
ཁྱོད་ཀྱི་ཞབས་སེན་ནོར་བུའི་མདངས༎
ཡུལ་གྲུའི་རྒྱལ་ཕྲན་གཙུག་ན་འཛིན༎
ཕྱོགས་ཀྱི་བུ་མོའི་རྣ་བ་ཡི༎
ཆུ་གཏེར་སྙན་གྲགས་ངང་མོས་བཟུང༎
མེ་ཏོག་གཞུ་ཅན་བུ་ཡི་ནི༎
བདུད་ལས་རྣམ་པར་རྒྱལ་བ་ཁྱོད༎
རྙེད་བཀུར་ཞགས་པས་མ་བཅིངས་ཀྱང༎
སྙན་གྲགས་འོད་ཀྱིས་ཕྱོགས་བརྒྱར་དྲངས༎
པ་སངས་སློབ་མ་ཕྲག་དོག་ཅན༎
ཡོངས་འདུའི་བདུད་རྩི་ལ་ཆགས་ཀྱང༎
བདུད་རྩི་བདག་པོར་འདུད་མི་བྱེད༎
ལྷ་མིན་གྱིས་སྦྱར་ལེགས་བཤད་ཀྱི༎
ལྷག་པར་འཚོ་བའི་ཡིད་བསྲུབས་ཅན༎
ལྷ་ཡི་བླ་མའི་གསུང་འཛིན་པར༎
རློམ་ཡང་ལྷ་ཡི་ལྷ་ལ་སྡང༎
དེ་ལྟ་ན་ཡང་ཤཱཀྱ་ཡི༎
བསྟན་པ་འཆི་མེད་ནོར་བུའི་ཕྲེང༎
བཤད་སྒྲུབ་རྒྱལ་མཚན་རྩེར་འཛིན་པའི༎
དཔལ་ལྡན་ཕྲིན་ལས་བཟང་པོ་ཅན༎
ཁྱོད་དང་མཚུངས་པ་གཞན་མ་མཆིས༎
ལྷ་མིན་གྱིས་སྦྱར་བདུད་རྩིའི་སྦྲང༎
གང་གི་མགྲིན་པར་འཐུངས་པ་ལས༎
བྱུང་བའི་ངོ་མཚར་ལྟད་མོ་ལ༎
དཔལ་གྱི་མགྲིན་པ་ཅན་ཞེས་ཟེར༎
བརྒྱ་བྱིན་དགྲ་བོའི་བདུད་རྩི་ནི༎
རབ་འཐུངས་ཐུབ་པའི་བརྟུལ་ཞུགས་ཅན༎
དེ་དག་གངས་ཅན་ལྗོངས་འདི་ན༎
བསྟན་པའི་བདག་པོར་སྨྲ་བར་ཡོད༎
ཨེ་མ་བློ་གསལ་གཞོན་ནུ་དག༎
མེ་ཏོག་གཞུ་ཅན་ཕམ་བྱེད་གྱིས༎
བསྟན་པའི་བདུད་རྩི་འཐུང་འདོད་ན༎
བརྒྱ་བྱིན་གྱིས་ནི་གུས་འདུད་པའི༎
རྗེ་བཙུན་འདི་ལ་ཕྱག་བྱོས་ཤིག༎
ཡང་རྗེ་བཙུན་དམ་པ་འདི་ཡུལ་དབུས་ཀྱི་བདེ་བ་ཅན་ན་བཞུགས་པའི་ཚེ། སྐུ་ཚེ་ལ་བར་ཆད་འབྱུང་སྲིད་པའི་དགོངས་པ་ཐུགས་ལ་འཁྲུངས་ནས།