[A:༦༡༢]ཐབས་ལ་མཁས་པ་དང༌། ལྷ་སོ་སོའི་ཐབས་ལ་མཁས་པ་གང་རུང་གིས་སྣང་བ་ཐ་མ་ལམ་དུ་མ་ལུས་པར་མཛད་ལ། རྣལ་འབྱོར་གཞན་རྣམས་ཀྱང་ཚུལ་བཞིན་དུ་ཉམས་སུ་ལེན་པར་མཛད་དོ། །ཁྱད་པར་དུ་མནལ་དུ་སོང་བའི་གནས་སྐབས་ཀུན་དུ། ཨོཾ་གསུམ་མམ། བདེ་མཆོག་གི་སྔགས་གང་རུང་སྒྲ་ལྷང་ལྷང་དང་བཅས་ཏེ་གསུང་བར་དྲུང་ན་གནས་པ་དག་གིས་ངེས་པར་གྱུར་ཏོ། །དྲུག་པ་ནི། ཏིང་ཀྲོལ་གནས་སུ་ཞེས་སོགས་ཚིགས་བཅད་གསུམ་སྟེ། གཡའ་མ་ཏིང་ཀྲོལ་དུ་རི་ཁྲོད་མཛད་པའི་ཚེ། ནུབ་གཅིག་མནལ་ལམ་དུ་བུད་མེད་སྨུག་ཚོན་མ་ཅིག་གིས་སྟོན་པའི་གསེར་སྐུ་ཅིག་གཏད་ནས་ས་སྐྱ་པཎྜི་ཏའི་བསྟན་པ་འདི་ཉམས་འདུག་པས། ད་ཁྱོད་ཀྱིས་འབད་པ་ཆེན་པོ་གྱིས་ལ་སློངས་ཤིག་ཟེར་བ་རྨིས་ཞེས་ཐོས་སོ། །ཡང་རྫིང་ལུང་དུ་ཐུགས་དམ་མཛད་པའི་ཚེ། འཕགས་པ་སྤྱན་རས་གཟིགས་མངོན་སུམ་དུ་གཟིགས་ཤིང༌། ལྷོ་ཕུག་ཏུ་བླ་མ་བཟང་སྐྱོང་བ་དང༌། ལྷན་ཅིག་རི་ཁྲོད་མཛད་པའི་ཚེ། ཐོ་རངས་ཤིག་ཁོང་གི་ལུང་པ་འོད་ཀྱིས་ཁེངས་པ་མཐོང་ནས་བལྟས་པས། རྗེ་འདི་ཉིད་སྤྱན་རས་གཟིགས་ཕྱག་བཞི་པར་གནས་པ་ལ། ལྷོ་རྩའི་སྤྱན་རས་གཟིགས་དེ་འདྲ་བ་དཔག་ཏུ་མེད་པས་བསྐོར་ནས་ཕྱག་ཐལ་མོ་སྦྱར་ནས་བཏུད་པར་མཐོང་བ་དང༌། ཡང་བདེ་བ་ཅན་གྱི་གཟིམས་ཁང་རྙིང་པ་ན་བཞུགས་དུས་ཤིག་བུད་མེད་ལས་དག་པ་ཅིག་གིས་སྤྱན་རས་གཟིགས་སུ་མཐོང་བའི་ལོ་རྒྱུས་ཀྱང་སྣང་ངོ༌། །ར་ལུང་གི་བྲག་ལ་བཞུགས་པའི་དུས་སུ་ད་ལྟ་བོད་ན་ས་སྐྱ་པཎྜི་ཏའི་གྲྭ་པ་མང་པོ་མེད། གང་ཡོད་པ་འདིའི་དཔོན་པོ་ཁྱོད་ཀྱིས་བྱེད་དགོས་ཟེར་བ་ཅིག་རྨིས་གསུངས་སོ། །བསམ་གཏན་ཕུག་ཏུ་སྐུ་མཚམས་མཛད་པའི་དུས་སུ། རྗེ་ས་ཆེན་བྱོན་ནས། ཁྱོད་ཀྱིས་སྔོན་དབང་བསྐུར་ཐོབ་པའི་དཀྱིལ་འཁོར་འདི་ཡིན་གསུངས་ནས་གསང་འདུས་འཇམ་རྡོར་གྱི་དཀྱིལ་འཁོར་ཡིན་སྙམ་པ་ཅིག་བསྟན། ཡང་ཆོས་ཁྲི་ཆེན་པོ་མང་པོ་འདུག་པ་སུའི་ཡིན་དྲིས་པས། ས་སྐྱ་པ་ཡབ་སྲས་ཁུ་དབོན་རྣམས་ཀྱི་ཡིན་ཟེར། དེ་རྣམས་ལས་ཆེ་བ་ཅིག་འདུག་པ་དྲིས་པས། ཁྱོད་ཀྱི་ཡིན་ཟེར་བ་