[A:612]thabs la mkhas pa dang / lha so so'i thabs la mkhas pa gang rung gis snang ba tha ma lam du ma lus par mdzad la/ rnal 'byor gzhan rnams kyang tshul bzhin du nyams su len par mdzad do/ /khyad par du mnal du song ba'i gnas skabs kun du/ oM gsum mam/ bde mchog gi sngags gang rung sgra lhang lhang dang bcas te gsung bar drung na gnas pa dag gis nges par gyur to/ /drug pa ni/ ting krol gnas su zhes sogs tshigs bcad gsum ste/ g.ya' ma ting krol du ri khrod mdzad pa'i tshe/ nub gcig mnal lam du bud med smug tshon ma cig gis ston pa'i gser sku cig gtad nas sa skya paNDi ta'i bstan pa 'di nyams 'dug pas/ da khyod kyis 'bad pa chen po gyis la slongs shig zer ba rmis zhes thos so/ /yang rdzing lung du thugs dam mdzad pa'i tshe/ 'phags pa spyan ras gzigs mngon sum du gzigs shing / lho phug tu bla ma bzang skyong ba dang / lhan cig ri khrod mdzad pa'i tshe/ tho rangs shig khong gi lung pa 'od kyis khengs pa mthong nas bltas pas/ rje 'di nyid spyan ras gzigs phyag bzhi par gnas pa la/ lho rtsa'i spyan ras gzigs de 'dra ba dpag tu med pas bskor nas phyag thal mo sbyar nas btud par mthong ba dang / yang bde ba can gyi gzims khang rnying pa na bzhugs dus shig bud med las dag pa cig gis spyan ras gzigs su mthong ba'i lo rgyus kyang snang ngo / /ra lung gi brag la bzhugs pa'i dus su da lta bod na sa skya paNDi ta'i grwa pa mang po med/ gang yod pa 'di'i dpon po khyod kyis byed dgos zer ba cig rmis gsungs so/ /bsam gtan phug tu sku mtshams mdzad pa'i dus su/ rje sa chen byon nas/ khyod kyis sngon dbang bskur thob pa'i dkyil 'khor 'di yin gsungs nas gsang 'dus 'jam rdor gyi dkyil 'khor yin snyam pa cig bstan/ yang chos khri chen po mang po 'dug pa su'i yin dris pas/ sa skya pa yab sras khu dbon rnams kyi yin zer/ de rnams las che ba cig 'dug pa dris pas/ khyod kyi yin zer ba