[A:༦༡༡]བཤེས་སེང་གེ་གྲགས་པ་ལ་ཁམས་ཕྱོགས་ཀྱི་རྣམ་རྟོག་དུ་མ་སྐྱེས་པའི་ནང་པར། དེ་ལྟ་བུའི་རྟོག་པ་འོག་འགྱུ་མ་བྱེད་པར་དགེ་སྦྱོར་གྱིས་གསུངས་པ་དང༌། བླ་མ་དབོན་པོ་ལ་ཆགས་པའི་རྣམ་རྟོག་མངོན་གྱུར་དུ་སྐྱེས་པའི་ཚེ། གདོང་ལ་ཕྱག་མཛུབ་བཙུགས་ནས། སྡུག་ཕྲུག་འདི་ལ་རྟོག་ངན་རྒྱུས་བྱུང་ངས་ཨེ་བཤད་གསུངས་པ་ལ། མི་གསུང་བར་ཞུ་ཞེས་ཞུས་སོ་ཞེས་ཁོང་རང་གཉིས་ལས་ཐོས་སོ། །གཉིས་པ་ནི། འཁོར་ལོ་བདེ་མཆོག་ཅེས་སོགས་ཚིགས་བཅད་བཞི་སྟེ། དང་པོ་གཉིས་ཀྱིས་བཟླས་པའི་རྣལ་འབྱོར། གསུམ་པས་ཐུན་མཚམས་ཀྱི་བྱ་བ། བཞི་པས་བཟའ་བ་དང༌། ཉལ་བ་དང༌། ལྡང་བའི་རྣལ་འབྱོར་གསུམ་བསྟན་ཏོ། །དེ་ཡང་བདག་ཉིད་ཆེན་པོ་འདིས་འཁོར་ལོ་བདེ་མཆོག་དང༌། འཇམ་དབྱངས་དང༌། གཤིན་རྗེའི་གཤེད་དང༌། མ་ཧཱ་ཀཱ་ལ་དང༌། སྤྱན་རས་གཟིགས་ལ་སོགས་པའི་གསང་སྔགས་བྱེ་བ་དུ་མ་རབ་ཏུ་བཟླས་པར་མཛད་དེ། ཡིག་དྲུག་བྱེ་བ་བདུན་སོང་གསུངས་ཤིང༌། གཞན་རྣམས་ལ་ཡང་རྒྱུན་དུ་ཐུགས་དམ་མཛད་པར་སྣང་ངོ༌། །ཁྱད་པར་རྩ་སྔགས་ཨཥྟ་སྔར་འབུམ་ཕྲག་དྲུག །ལྷ་གོང་དུ་འབུམ་ཕྲག་བདུན་བཟླས་པས་མནལ་ལམ་དུ་ཡི་དམ་གྱིས་ལུང་བསྟན་པར་ངེས་ཏེ། རྒྱུ་དུས་ཀྱི་དབང་བསྐུར་ཞིག་གི་དུས་སུ། མཚན་མའི་བསྙེན་པ་ཐ་མ་མིང་གདགས་སུ་ཆུད་ཙམ་བྱུང་བས་ཞེས་གསུངས་པ་དང༌། ཨེ་ཝཾ་ཆོས་ལྡན་དུ་བཞུགས་པའི་ནུབ་གཅིག་གླིང་སྐྱའི་རྒྱབ་རི་དེ་ན་ག་ཡ་དྷ་རའི་བུམ་ཆུ་ཡིན་ཟེར་བའི་ཆུ་ཆེན་པོ་སྐྱ་ཆིལ་བ་ཅིག་བརྡོལ་བྱུང་བས། དེ་མ་ཐག་ཏུ་ཆོས་གོས་ལ་གཤོག་པ་མཛད་ནས་གླིང་སྐྱའི་བྲག་ལ་འཕུར་སོང་བ་རྨིས་གསུངས་པ་དང༌། ཡང་བདེ་མཆོག་གི་བསྙེན་པ་མཛད་པའི་ཚེ། རི་ངོས་ཆེན་པོ་ཅིག་བདེ་མཆོག་གི་རྡུལ་ཚོན་གྱི་དཀྱིལ་འཁོར་ཆེན་པོ་ཅིག་གིས་ཁེབས་འདུག་པར་རྨིས་གསུངས་སོ། །ཐུན་མཚམས་ཀྱི་གནས་སྐབས་སུ་མཆོད་གཏོར་ལ་སོགས་པ་དགེ་བའི་བྱ་བ་འབའ་ཞིག་གིས་དུས་འདའ་བར་མཛད་ཅིང༌། སྤྱོད་ལམ་གྱི་ཚེ། ལྷག་པའི་ལྷའི་