[A:༦༡༣]རྨིས། ཡང་ཞྭ་ལུའི་ས་ཆ་འདྲ་བ་ཅིག་ན་ཆོས་ཁྲི་ཆེན་པོ་གཉིས་འདུག་པ་དྲིས་པས། བུ་སྟོན་རིན་པོ་ཆེ་དང༌། སེམས་དཔའ་ཆེན་པོ་གཉིས་ཀྱི་ཡིན་ཟེར། དེ་གཉིས་ལས་ཆེ་བ་ཅིག་འདུག་པ་དྲིས་པས། ཁྱོད་ཀྱི་ཡིན་ཟེར་བ་རྨིས། ཡང་ནུབ་གཅིག་ཆོས་རྗེ་རིན་པོ་ཆེས་མཆོད་སྟེགས་འདྲ་ཁྲ་ཡལ་ཡལ་ཞིག་གཏད་ནས། འདི་ན་བཟའ་བྲག་ཕུག་པའི་ཡིན། ཁྱོད་གཞན་དོན་རྒྱུན་རིང་བའི་རྟེན་འབྲེལ་བྱེད་པ་ཡིན་ཟེར་བ་རྨིས་སོ། །བདུན་པ་ལ་གཉིས་ཏེ། རྒྱུ་རྒྱལ་ཚབ་ཏུ་དབང་བསྐུར་བའི་ཚུལ། འབྲས་བུ་ཕྲིན་ལས་མཛད་པའི་ཚུལ་ལོ། །དང་པོ་ནི། འདྲེན་པ་མཆོག་གིས་ཞེས་སོགས་ཚིགས་བཅད་གཉིས་ཏེ། སྐྱེས་བུ་དམ་པ་རྣམས་ནི། དམ་པ་གོང་མའི་སྲོལ་བཟུང་ནས། རྗེས་འཇུག་གི་གདུལ་བྱ་རྣམས་ཀྱི་མགོན་སྐྱབས་མཛད་པ་ནི་ཆོས་ཉིད་དོ། །དེ་ཡང་འདི་ལྟར་བསམ་གཏན་ཕུག་གི་སྐུ་མཚམས་གྲོལ་ནས། རེ་དགུ་པ་མེ་ཕོ་བྱི་བའི་ལོ་ལ་སྐལ་ལྡན་མང་པོ་ལ་གསུང་ཆོས་མང་པོ་བཙུགས་ཏེ། འཁོར་ལོ་བདེ་མཆོག་གི་ཆོས་སྐོར་མང་པོ་དང༌། ལམ་འབྲས་ཀྱི་སྣང་བ་གསུམ་གྱི་ཁྲིད་སོང་བའི་ཚེ། ཨེ་ཝཾ་ཆོས་ལྡན་ནས། ཆོས་རྗེའི་ཕྱག་རྟགས་དང་བཅས་ཏེ་གདན་འདྲེན་པ་བྱུང་ནས་ས་ག་ཟླ་བའི་ཚེས་བཅུ་ལ་བཏེག་སྟེ། ཉི་ཤུ་གསུམ་ལ་ཨེ་ཝཾ་ཆོས་ལྡན་དུ་ཕེབས་སོ། །དེ་ཡང་ཆོས་རྗེའི་དགོངས་པ་ལ། ཚེས་བཅུ་ཙམ་ལ་ཕེབས་སམ་སྙམ་ནས་བྱ་བྲལ་བ་ཨེ་བྱུང་ལྟོས་ཞེས་ཡང་ཡང་གསུངས་ཤིང༌། ནམ་མཁའ་ལ་འཇའ་འོད་ཀྱི་བྱེ་བྲག་མང་པོ་དང་མེ་ཏོག་གི་ཆར་ཡང་མང་པོ་བྱུང་ངོ༌། །བཅུའི་ཉིན་པར་ཡང་དེ་བཞིན་དུ་བྱུང་ཡང༌། ཉི་ཤུ་ལྔའི་བར་བརྟན་པར་བཞུགས་པ་ནི། རྗེ་འདི་ཉིད་ལ་བསྟན་པ་གཏད་པའི་ཆེད་དུ་ཡིན་པར་ངེས་སོ། །དེ་ནས་ཉི་ཤུ་བཞིའི་ཉིན། ཞོ་བཅོ་བརྒྱད་ཡོད་པའི་གསེར་ཐིག་པོ་ཅིག་གིས་མགོ་བྱས། གསེར་ཞོ་སུམ་ཅུ་སོ་བགྲང་ཞིག་ཕུལ་ནས་མཇལ་བའི་ཚེ། ཆོས་རྗེ་ཉིད་ཀྱི་སྐུ་ཆོས་དང༌། རྡོ་རྗེ་དྲིལ་བུ་དང༌། རྗེ་ས་ཆེན་གྱི་ཡིན་ཐང་རྣམས་གནང་ནས། རྗེས་ཀྱི་བྱ་བ་