[A:༦༠༧]ཀྱང་ཁ་ལ་འདོད་པ་མེད་པ་སྐད་སྟོན་པའི་སྤྱོད་པ་ནི་ཅི་ཡང་མེད་སྙམ་ནས། དེ་དག་ལ་འདོད་བཞེད་མེད་པའི་རྒྱུ་མཚན་དང༌། ཚེ་དང་སྒྲུབ་པ་སྙོམས་པར་འདོད་པའི་རྒྱུ་མཚན་རྣམས་རིམ་པར་ཞུས་ནས། ཡོས་ལོ་ལ་ཡར་ཕེབས་པར་རྩོམ་པ་ན། ཆོས་རྗེའི་དྲུང་དུ། ཡར་སླེབ་ནས་ལོ་གསུམ་དུ་མཚམས་དམ་པ་ཅིག་བྱེད། དེ་ནས་ཀྱང་ཕལ་ཆེར་མཚམས་ཀ་བྱེད་པར་ཞུ་ཞུས་པས། ཆོས་རྗེའི་ཞལ་ནས། སྤྱིར་སངས་རྒྱས་སྒྲུབ་པ་ལ་གནས་ལུགས་རྟོགས་པའི་ཤེས་རབ་ཕུན་སུམ་ཚོགས་པ་ཅིག་དགོས། དེ་ཡང་གསང་སྔགས་ཀྱི་རྫོགས་རིམ་ཟབ་མོ་ལ་བརྟེན་ནས་སྒྲུབ་པའི་ཚུལ་ཡོད་ཀྱང༌། དེ་འགྲུབ་པར་དཀའ་བས། ཐོས་བསམ་ལ་བརྟེན་ནས་བསྒྲུབ་པ་ཁྱེ་ཆེ། དེ་ལ་ཡང་གཞན་ལ་ཉན་པ་བས། རང་གི་ཅུང་ཟད་ཤེས་ནས་འཆད་པ་འདི་ཤེས་རབ་སྐྱེ་ཕུལ་ཆེ་བས། ཡར་ཕྱོགས་སུ་དོན་གཉེར་བ་རེ་རེ་ཙམ་བྱུང་ན་སྣ་ལན་མཛོད་གསུངས་པ་ཐུགས་ལ་བཞག་ནས་མུས་སུ་བྱོན་ཏེ། དེའི་དབྱར་ཆུ་བཟང་དགོན་པར་བཞུགས་ནས་བསགས་སྦྱང་གི་རྣལ་འབྱོར་གཙོ་བོར་མཛད་དོ། །དེའི་སྟོན་བཞུགས་ནས་ཞེ་དགུ་པ་འབྲུག་ལོ་ཚང་མ་ལ་ལྷ་གོང་རི་ཁྲོད་དུ་རྩ་སྔགས་ཨཥྟའི་བསྙེན་པ་འབུམ་ཕྲག་བདུན། ཁ་སྐོང་གི་སྦྱིན་སྲེག་དང་བཅས་པ། མཇུག་ཏུ་ཤཱ་ས་ན་འབུམ་ཕྲག་བཞི་དང་བཅས་པ་གདན་གཅིག་གི་སྟེང་དུ་མཛད་དོ། །དེ་ནས་ལྔ་བཅུ་པ་སྦྲུལ་གྱི་ལོ་ལ་ལུང་པ་དེའི་ཉ་དང་རི་དྭགས་སོགས་སྐྱོབ་པ་དང༌། བཤད་སྒྲུབ་ཀྱི་བསྟན་པ་རྒྱུན་མི་ཆད་པའི་རྟེན་འབྲེལ་ཁྱད་པར་ཅན་གཟིགས་ནས། གླིང་ཁ་བདེ་བ་ཅན་གྱི་དགོན་པ་བཏབ་སྟེ། དེ་ཉིད་ཀྱི་ལོ་ནི་གུ་ལམ་འབྲས་ལ་སོགས་པའི་ཟབ་ཆོས་བཙུགས། དེར་བཞུགས་པའི་དགེ་འདུན་ཐམས་ཅད་གཞི་ཚུལ་ཁྲིམས་རྣམ་པར་དག་པའི་སྟེང་དུ། ཕ་རོལ་ཏུ་ཕྱིན་པའི་བློ་སྦྱོང་གིས་རྒྱུད་སྦྱངས་ནས། གསུང་ངག་ལ་ཐུགས་དམ་མཛད་དེ། རབ་ཚེ་དང་སྒྲུབ་པ་མཉམ་པ་དང༌། འབྲིང་ཐུན་བཞིའི་རྣལ་འབྱོར། ཐ་མ་ཐུན་གཉིས་ཀྱི་རྣལ་འབྱོར་ཉམས་སུ་ལེན་པ་ལ་བཀོད་