[A:༦༠༦]སྒྲུབ་ཐབས་ཀུན་དུ་བཟང་པོ། རྫོགས་རིམ་གྲོལ་བའི་ཐིག་ལེ་སྟེ་གཉིས་དང༌། མར་མེ་མཛད་བཟང་པོའི་དཀྱིལ་ཆོག་བཞི་བརྒྱ་ལྔ་བཅུ་པ་ལ་སོགས་པ་འདུས་པའི་རྒྱ་གཞུང་རྣམས་དང༌། ཀྱེའི་རྡོ་རྗེའི་བཀའ་སྲོལ་གསུམ་ལ་གཙོ་ཆེའི་ཆོས་སྣ་སུམ་ཅུ་དགུར་གྲགས་པ་རྣམས་དང༌། འཁོར་ལོ་བདེ་མཆོག་ལ་ལོ་ཧི་པས་མཛད་པའི་དཔལ་མངོན་པར་རྟོགས་པ་སྨད་ལྔ་དང་བཅས་པ་དང༌། དྲིལ་བུ་སྐོར་གསུམ། ནག་པོ་གཞུང་དྲུག་ལ་སོགས་པ་གྲུབ་ཆེན་གྱི་གཞུང་དང༌། རྒྱུད་ཀྱི་འགྲེལ་པ་ལ་སོགས་པ་བསམ་གྱིས་མི་ཁྱབ་པ་དང༌། རྗེ་བཙུན་ས་སྐྱ་པ་ཡབ་སྲས་ལྔའི་བཀའ་འབུམ། ཆོས་རྗེ་ཉིད་ཀྱི་བཀའ་འབུམ་ལ་སོགས་པ་བོད་ཀྱི་ལེགས་བཤད་ཀྱི་ལུང་རབ་ཏུ་མང་པོ་གསན་ནོ། །དེ་དག་ཀྱང་ཐོས་བསམ་གཙོ་ཆེ་བའི་དབང་དུ་བྱས་པ་ཡིན་གྱིས། ཡང་དག་པར་ན་གོང་དུ་སྨོས་པའི་ཁྲིད་དེ་དག་ཞུས་པའི་དུས་ཉིད་ནས་བསྒོམས་པས་ཉམས་མྱོང་རྒྱུད་ལ་སྐྱེས་པར་མཛད་ཅིང༌། བར་སྐབས་སུ་རི་ཁྲོད་དབེན་པ་རྣམས་སུ་བཞུགས་ནས་ཀྱང་ཉམས་ལེན་ལ་དྲིལ་བ་ཡིན་ནོ། །ལྔ་པ་ལ་གཉིས་ཏེ། སྤྲོས་པ་བཅད་ནས་ཉམས་ལེན་ལ་བཞུགས་པའི་ཚུལ། ཉམས་ལེན་ཇི་ལྟར་མཛད་པའི་ཚུལ་གཏན་ལ་དབབ་པའོ། །དང་པོ་ནི། རྒྱ་ཆེན་ཐོས་པས་ཞེས་སོགས་ཚིགས་བཅད་གཅིག་སྟེ། སྐྱེས་བུ་དམ་པ་རྣམས་ནི། ཐོས་བསམ་གྱི་སྒྲོ་འདོགས་ཆོད་པའི་ཡང་དག་པའི་ལྟ་བའི་དོན་དབེན་པའི་གནས་སུ་རྩེ་གཅིག་ཏུ་ཉམས་སུ་ལེན་པ་ནི་ཆོས་ཉིད་དོ། །དེ་ཡང་འདི་སྐད་ཐོས་ཏེ། ཞེ་བདུན་པ་ཤིང་ཕོ་སྟག་གི་ལོ་ལ་ཨེ་ཝཾ་ཆོས་ལྡན་དུ་ཕེབས་པ་ན། ཆོས་རྗེའི་ཞལ་ནས་ད་འདི་རུ་སྡོད་ལ་བཤད་ཉན་གྱིས། གདན་སའི་མིང་བཏགས་འདོད་ནའང་བྱེད་པས་ཆོག །བེར་ཐུལ་འདྲ་གོན་པ་དང༌། མཆོད་ཆ་དང་རྟེན་གསུམ་སོགས་འདོད་ནའང༌། བླ་བྲང་ནས་ལོང་ལ་བེད་གཅོད་གྱིས། བདག་ཆེན་གྲགས་བློ་བའི་དབོན་པོ་ཞིག་ཡོད་པ་འདི་རབ་བྱུང་བྱེད་པའི་སློབ་དཔོན་ཡང་འཚོལ་བ་ཡིན་གསུངས་པ་ལ། བདག་ལ་འདི་ལྟ་བུའི་སྤྲོས་པ་མེད་པའི་རྒྱུ་མཚན་ཐུགས་ལ་མངའ་རྒྱུ་ཡིན། ཞེ་ལ་འདོད་པ་ཡོད་