[A:༦༠༨]པར་མཛད་ཅིང༌། བདེ་དགེས་གསང་གསུམ་དང་ཀུན་རིག་གི་ཕྱག་ལེན་རྣམ་པར་དག་པའི་སྒྲུབ་མཆོད་ཀྱི་རྒྱུན་ཡང་འཛུག་པར་མཛད་དོ། །དེ་ནས་བཟུང་སྟེ་གཙོ་བོར་སྒྲུབ་པ་ལ་གཞོལ་ཞིང༌། ཆོས་རྗེའི་གསུང་དང་དུ་ལེན་པའི་རྒྱུ་མཚན་གྱིས་སྐབས་སྐབས་སུ་གདུལ་བྱ་སྐལ་ལྡན་རྣམས་ལ་གསུང་ངག་ལ་སོགས་པ་ཟབ་མོའི་ཆོས་ཀྱིས་ཚིམ་པར་མཛད་པའི་ངང་ནས། ང་གཉིས་པ་ལ། ཨེ་ཝཾ་ཆོས་ལྡན་དུ་ལན་ཅིག་ཕེབས། སླར་ཡང་ང་དགུ་པ་མེ་ཕོ་སྟག་གི་ལོ་ལ་ཨེ་ཝཾ་ཆོས་ལྡན་དུ་ཕེབས་ནས་གསུང་ངག་ཞུས་པའི་ཚེ། ཆོས་རྗེ་བཟང་པོའི་ཞབས་གསུང་ངག་གི་དམ་ཚིག་གི་བཤད་པ་ཡན་རྫོགས་ནས། ཡངས་པའི་ས་ཆེན་པོ་ལ་དབང་བསྒྱུར་བ་རིན་སྤུངས་པ་སྐུ་མཆེད་ཀྱིས་གདན་དྲངས་ཏེ། རྗེ་འདི་ཉིད་ལ་ལམ་འབྲས་པ་རྣམས་ལ་བདག་མེད་མའི་དབང་བསྐུར་ཞིག་གྱིས་ལ་ལྟ་བ་འཁོར་འདས་དབྱེར་མེད་ཤོད། མཁར་རྔ་འདི་ས་སྐྱ་པཎྜི་ཏའི་ཆོས་རྔ་ཡིན་པས་ཆོས་བརྡ་ཐོང་གསུངས་ནས་གཤེགས་པའི་རྗེས་སུ་བཀའ་བཞིན་བསྒྲུབ་པ་ལ་ཟླ་བ་གཉིས་བཞུགས་སོ། །དེ་ནས་དཔལ་ནཱ་ལེནྡྲར་རོང་སྟོན་ཆོས་རྗེའི་སྤྱན་སྔར་མཇལ་དུ་བྱོན་ནས། ཕར་ཕྱིན་ཁྲིད་ཡིག །མི་གཡོ་བ་དཀར་པོའི་རྗེས་གནང༌། བསྒོམ་རིམ་ཐ་མའི་བཤད་པ་རྣམས་གསན་ནས། དེ་ཕྱོགས་ཀྱི་དགེ་བའི་བཤེས་གཉེན་ཆེ་བར་གྲགས་པ། གླང་ཐང་སྤྱན་སྔ་བ་ཀུན་དགའ་རྒྱལ་མཚན་པ་ལ་སོགས་པས་ཆོས་ཞུ་བའི་ཆེད་དུ་ཐབས་ཀྱིས་གདན་འདྲེན་པར་མཛད་ན་ཡང༌། དེར་མ་བཞུགས་པར་མུས་སུ་བྱོན་ནོ། །རེ་གཅིག་པ་ལ་ཆོས་རྗེ་བཟང་པོའི་ཞབས་མངའ་རིས་སུ་ཐེགས་པའི་རྗེས་སུ། ཕྱག་རྟགས་དང་བཀའ་ཞལ་ལ་བརྟེན་ནས། ཨེ་ཝཾ་ཆོས་ལྡན་དུ་གསུང་ངག་ལ་སོགས་པའི་ཟབ་ཆོས་དུ་མས་དེར་བཞུགས་པའི་དགེ་འདུན་རྣམས་ཚིམ་པར་མཛད་ནས་ལོ་གཅིག་བཞུགས། སླར་ཡང་རེ་གསུམ་པ་དང༌། རེ་བདུན་པ་ལ་ཨེ་ཝཾ་ཆོས་ལྡན་དུ་ཕེབས་ཤིང༌། ཕྱི་མ་ལ་རྒྱུད་འབུམ་ལ་སོགས་པའི་ཆོས་མང་དུ་གསུངས་སོ། །དེའི་སྟོན་མུས་སུ་ཕབས་ནས་དབེན་གནས་བསམ་གཏན་ཕུག་བརྩིགས་ཏེ། རེ་བརྒྱད་པ་ཕག་གི་ལོ་