[A:༦༠༥]གྱི་བྱེ་བྲག་ཐུན་མོང་དང་ཐུན་མོང་མ་ཡིན་པ་རྣམས་གསན་ནོ། །བཞི་པ་རྗེས་གནང་གི་སྐོར་ལ། རྡོ་རྗེ་རྣམ་འཇོམས་དང༌། འཕགས་མ་སྒྲོལ་མ་ལ་སོགས་པ་བར་ཆད་ཞི་བའི་ལྷ་རྣམས་དང༌། དོན་ཞགས་ལྷ་ལྔ་མ། བཅུ་གཅིག་ཞལ་ལ་སོགས་པ་བྱང་ཆུབ་ཀྱི་སེམས་རྒྱས་པའི་ལྷ་རྣམས་དང༌། སྒྲོལ་མ་དཀར་མོ་དང༌། གཙུག་ཏོར་རྣམ་རྒྱལ་ལ་སོགས་པ་ཚེ་རྒྱས་པའི་ལྷ་རྣམས་དང༌། འཇམ་དཔལ་གྱི་རིགས་རབ་ཏུ་མང་པོ་དང༌། ཤེར་ཕྱིན་དཀར་མོ་མི་གཡོ་བ་དཀར་སྔོན་ལ་སོགས་པ་བློ་གྲོས་རྒྱས་པའི་ལྷ་རྣམས་དང༌། ཛམྦྷ་ལ་དང༌། ནོར་རྒྱུན་མ་ལ་སོགས་པ་ནོར་རྒྱས་པའི་ལྷ་རྣམས་དང༌། དམར་པོ་སྐོར་གསུམ་ལ་སོགས་པ་འགྲོ་བ་དབང་དུ་སྡུད་པའི་ལྷ་རྣམས་དང༌། ནག་པོ་ཆེན་པོ་ལྕམ་དྲལ་དང༌། མགོན་པོ་གདོང་བཞི་པ་ལ་སོགས་པ་བསྟན་པ་བསྲུང་ཞིང་དྲག་པོའི་ལས་སྒྲུབ་པའི་ལྷ་རྣམས་ཀྱི་རྗེས་གནང་རབ་ཏུ་མང་པོ་དང༌། སྒྲུབ་ཐབས་རྒྱ་མཚོར་གྲགས་པ་རྗེས་གནང་ཉིས་བརྒྱ་དང་སུམ་ཅུ་རྩ་བགྲངས་བ་དང༌། སྒྲུབ་ཐབས་བརྒྱ་རྩར་གྲགས་པ་རྗེས་གནང་དགུ་བཅུ་གོ་དྲུག་བཞུགས་པའི་རྗེས་གནང་གི་རིགས་རབ་ཏུ་མང་པོ་གསན་ནོ། །གཞན་ཡང་བིརྺ་པའི་ལུགས་ཀྱི་རྡོ་རྗེ་རྣམ་འཇོམས་ཀྱི་བྱིན་རླབས་དང༌། ན་རོ་མཁའ་སྤྱོད་ལ་སོགས་པ་མཁའ་སྤྱོད་ཀྱི་རིགས་མང་པོའི་བྱིན་རླབས་དང༌། བདེ་མཆོག་དཀར་པོའི་བྱིན་རླབས་ལ་སོགས་པ་བྱིན་རླབས་ཀྱི་རིགས་མང་པོ་གསན་ནོ། །ལྔ་པ་ལུང་གི་སྐོར་ལ། རྒྱུད་འབུམ། གཟུངས་འདུས། གཟུངས་འབུམ་རྣམས་དང༌། དེ་དག་གི་དགོངས་འགྲེལ་ལ། རྒྱུད་སྡེ་འོག་མ་གསུམ་གྱི་རྒྱ་གཞུང་འགའ་ཞིག་དང༌། གཤིན་རྗེའི་གཤེད་ནག་པོའི་སྐོར་འགའ་ཞིག་དང༌། དམར་པོ་ལ་བིརྺ་པའི་བསྐྱེད་རྫོགས་ཀྱི་གཞུང་དྲུག་ལ་སོགས་པ་དང༌། གསང་བ་འདུས་པ་འཕགས་པ་ཡབ་སྲས་ཀྱིས་མཛད་པའི་གཞུང་རྣམས་དང༌། དེའི་རྗེས་འབྲང་ནག་པོ་པ་ལ་སོགས་པའི་གཞུང་རྣམས་དང༌། སངས་རྒྱས་ཡེ་ཤེས་ཞབས་ཀྱིས་མཛད་པའི་