[A:༦༠༤]བདེ་མཆོག །གསང་བ་འདུས་པ། གཤིན་རྗེའི་གཤེད་ལ་སོགས་པའི་བསྐྱེད་པའི་རིམ་པ། བཀའ་སྲོལ་དེའི་ལུགས་ཐུན་མོང་མ་ཡིན་པ་རྣམས་ནི་ལུགས་གཞན་དང་མ་འདྲེས་པ་རྣམས་དང༌། ཐུན་མོང་སྦྱང་གཞི་སྦྱོང་བའི་ཚུལ་ལ་སོགས་པ་རྣམས་ནང་ཕན་ཚུན་མི་འགལ་ཞིང༌། རྒྱུད་སྡེའི་དགོངས་པ་གྲུབ་ཐོབ་ཀྱིས་བཀྲལ་བ་ཇི་ལྟ་བ་དང༌། དེ་ལ་ཡང་ཕྱི་ནང་གི་བསྐྱེད་པའི་རིམ་པའི་ཁྱད་པར་དང༌། ནང་བསྐྱེད་པའི་རིམ་པ་ལ་ཡང༌། རྒྱུད་སྡེའི་ཁྱད་པར་གྱིས་ཟབ་ཁྱད་ཀྱི་རིམ་པ་ཇི་ལྟར་ཡོད་པ་དང༌། དེ་ལ་གཞན་དག་གིས་རྟོག་པས་བརྟགས་པའི་ལུགས་རྣམས་ལུང་རིགས་ཀྱིས་ཅི་ལྟར་དགག་པའི་ཚུལ་རྣམས་ལེགས་པར་གསན་ཅིང་སྒྲོ་འདོགས་ཆོད་པར་མཛད་དེ། རང་གིས་བསྒོམས་ན་ས་ལམ་ཆོད་ཅིང༌། གཞན་ལ་བསྟན་ན་གདུལ་བྱ་མི་བསླུ་བར་མཛད་པ་ཡིན་ནོ། །གཉིས་པ་རྫོགས་པའི་རིམ་པ་ལ། རྡོ་རྗེ་འཇིགས་བྱེད་ཀྱི་རྭ་རྩེ་སེམས་འཛིན། གཤེད་དམར་གྱི་ཤིན་ཏུ་སྤྲོས་མེད། གསང་བ་འདུས་པ་འཕགས་ལུགས་ཀྱི་རིམ་པ་ལྔ། ཀྱེ་རྡོ་རྗེ་སོགས་ལ་བརྟེན་པའི་སྔར་སྨོས་པའི་ལམ་སྐོར་དགུ། འཁོར་ལོ་བདེ་མཆོག་དྲིལ་བུ་པའི་རིམ་པ་ལྔ། ནག་པོ་སྤྱོད་པའི་རིམ་པ་བཞི་པ། རྩ་དབུ་མ་ལམ་གྱི་ཡན་ལག་དང་བཅས་པ། བདེ་མཆོག་དཀར་པོའི་ཁྲིད། བདེ་མཆོག་སྙན་བརྒྱུད། དུས་ཀྱི་འཁོར་ལོའི་ཟབ་ལམ་རྡོ་རྗེ་རྣལ་འབྱོར། སྦྱོར་བ་ཡན་ལག་དྲུག་ལ་སོགས་པའི་རྫོགས་རིམ་རྣམས་གསན་ཅིང་ཐུགས་ཉམས་སུ་བཞེས་པར་མཛད་དོ། །གསུམ་པ་ཐུན་མོང་སྒྲུབ་པའི་མན་ངག་ལ། རབ་རིག་འཛིན་མཁའ་སྤྱོད་འཁོར་ལོས་སྒྱུར་བ་སྒྲུབ་པ་སོགས་དང༌། འབྲིང་གྲུབ་པ་ཆེན་པོ་བརྒྱད། དམན་པ་ཞི་སོགས་ཀྱི་ལས་རབ་འབྱམས་སྒྲུབ་པའི་ཚུལ། རྒྱུད་སྡེ་ལས་གསུངས་པ་བརྒྱུད་པའི་མན་ངག་ལས་བྱུང་བ་རྣམས་དང༌། ཁྱད་པར་དུ་དམར་པོ་སྐོར་གསུམ་ལ་བརྟེན་ནས་ལས་སྒྲུབ་ཚུལ་གྱི་བྱེ་བྲག་མང་པོ་དང༌། རྡོ་རྗེ་ནག་པོ་ཆེན་པོ་དང༌། མགོན་པོ་གདོང་བཞི་པ་ལ་བརྟེན་ནས་ལས་སྒྲུབ་ཚུལ་