[A:༦༠༡]རྒྱལ་མཚན་དཔལ་བཟང་པོས་མཛད་པའི་ཚད་མ་དང་པོ་གསུམ་སྟོན་པ་པོད་ནག་མར་གྲགས་པ་རྣམས་ཡོངས་སུ་རྫོགས་པར་གསན་ཏེ། སོ་སོའི་ཕྱག་ལེན་དང་སྐབས་ཀྱི་གོ་བ་རྣམས་ལ་སྒྲོ་འདོགས་ཆོད་པར་མཛད་པ་ཡིན་ནོ། །གཉིས་པ་ཉེ་བརྒྱུད་ལ་རྣལ་འབྱོར་དབང་ཕྱུག་གིས་ས་ཆེན་ལ་གནང་བ་དང༌། ས་ཆེན་གྱིས་རྗེས་བཙུན་ལ་གནང་བ་གཉིས་ལས། དང་པོ་ནི་ལམ་སྦས་ཏེ་བཤད་པ་ལམ་ཟབ་བླ་མའི་རྣལ་འབྱོར། །རྣལ་འབྱོར་དབང་ཕྱུག་གི་བསྲུང་བ་གཉིས་ལ་སོགས་པ་ཡིན་ལ། གཉིས་པ་ནི་བརྡ་དོན་གསལ་བ་སྟེ། དེ་དག་ཀྱང་ཁྲིད་བྱིན་རླབས་དང་བཅས་པ་རྫོགས་པར་གསན་ནོ། །གཞན་ཡང་ལམ་སྐོར་ལ། ངག་དབང་གྲགས་པའི་ཕྱག་རྒྱ་ཆེན་པོ་ཡི་གེ་མེད་པ། ཏོག་རྩེ་བའི་བསམ་མི་ཁྱབ། ཀླུ་སྒྲུབ་ཀྱི་མཆོད་རྟེན་དྲུང་ཐོབ། ནག་པོ་པའི་ཨོ་ལ་པ་ཏི། ཡོན་པོ་བསྲང་བ། པདྨ་བཛྲ་གྱི་ལམ། ཌོམྦི་པའི་ལྷན་ཅིག་སྐྱེས་གྲུབ། ཨིནྡྲ་བྷཱུ་ཏིའི་ཕྱག་རྒྱའི་ལམ་དང་བརྒྱད་ལས། ཞར་བྱུང་ལ་དག་པ་གསུམ་གྱི་ཁྲིད། གཏུམ་མོའི་དམིགས་པ་ཉི་ཤུ་རྩ་དགུ། སྒོ་དྲུག་ཆོས་འགྲེལ་ལ་སོགས་པ་བསམ་གྱིས་མི་ཁྱབ་པ་གསན་ཏེ། མདོར་ན་ལམ་འབྲས་ལམ་སྐོར་ཞར་བྱུང་གྀ་ཆོས་སྐོར་རྣམས། །ཆོས་རྗེ་བཟང་པོའི་ཞབས་ཀྱིས། རྗེ་བུདྡྷ་ཤྲཱི་ལ་གསན་པའི་གསན་ཡིག་ནང་ལྟར་བུམ་པ་གང་བྱོའི་ཚུལ་དུ་བཞུགས་པ་ཡིན་ནོ། །གསུང་ངག་རྫོགས་ནས་ཨེ་ཝཾ་ཆོས་ལྡན་གྱི་གཞི་འཛུགས་པ་ལ། ཆོས་རྗེའི་ཆག་ཕྱིར་ཞེ་གཉིས་པ་ས་མོ་བྱའི་ལོ་ལ་ངོར་དུ་ཕེབས། དེའི་སྟོན་ཆོས་རྗེའི་ཞལ་ནས། ད་འདི་རུ་སྡོད་ལ་བཤད་ཉན་གྱིས་གསུངས་པ་ལ། ཕ་རྒན་ཅིག་ཡོད་པ་དེ་ལ་སྔར་ཞབས་ཏོག་ཆེར་མ་འཕྲོད་པས་ཤི་ཁ་སྔས་མགོ་ན་ཡོད་པ་ཙམ་ཞིག་དགོས་པས་ཡར་འགྲོ་བར་བགྱི་ཞུས་ནས། མུས་སུ་ཕེབས་ཏེ་ལོ་བཞི་བཞུགས། གླང་ལོ་ལ་ཡབ་རྒན་གཤེགས་པའི་ཞེ་དགུའི་བར་དུ་ཀུན་རིག་གི་ཆོ་ག་མཛད་པས། མནལ་མལ་དུ་ཡབ་རྒན་གད་གཡང་ཞིག་ལ་འཆར་ལ་ཁད་འདུག་པ་ལ། ལག་པ་ནས་འཐེན་ནས་