[A:༦༠༢]བདེ་ས་ཞིག་ཏུ་བཞག་པ་རྨིས་གསུངས་སོ། །དེ་ཉིད་ཀྱི་ལོ་ཆོས་རྗེ་རྒྱལ་མཆོག་པ་ཁྲོ་ཕུར་སྨོན་ལམ་མཛད་པའི་དྲུང་དུ་མཇལ་དུ་བྱོན་ནས། ཨེ་ཝཾ་ཆོས་ལྡན་དུ་ཡང་བྱོན་པས། ཆོས་རྗེའི་ཞལ་ནས་སྔར་བཞིན་ཞལ་ད་གནང་བ་ལ། ད་རུང་རུས་པ་ལ་སཱཙྪ་འདེབས་པ་སོགས་ཀྱི་བྱ་བ་འགའ་ཞིག་དགོས་པས་ཡར་འགྲོ་ཞུས་ནས་མུས་སུ་བྱོན་ནས་ལོ་གཅིག་བཞུགས་སོ། །མདོར་ན་ས་སྐྱར་སྔར་ལོ་གསུམ། ཕྱིས་ཟླ་བ་བདུན། ཨེ་ཝཾ་ཆོས་ལྡན་དུ་ལན་བརྒྱད་ཕེབས་ནས། དམ་པའི་ཆོས་གསན་པའི་རྣམ་གྲངས་རྒྱས་པར་ནི་འདིར་བརྗོད་པར་མི་ནུས་ལ། མདོར་བསྡུས་པ་ཙམ་ཞིག །བསྟན་པའི་གོ་རིམས་དང་བསྟུན་ནས་བརྗོད་ན། ཕ་རོལ་ཏུ་ཕྱིན་པའི་ཆོས་སྐོར་ལ། དབུ་མ་ལུགས་དང༌། སེམས་ཙམ་ལུགས་ཀྱི་སེམས་བསྐྱེད་གཉིས། རྒྱལ་སྲས་ཐོགས་མེད་པས་ཆོས་རྗེ་བུདྡྷ་བ་ལ་གནང་བའི་བློ་སྦྱོང་དོན་བདུན་མའི་ཁྲིད། ཆོས་རྗེ་ཤར་པ་ནས་བརྒྱུད་པའི་ཞེན་པ་བཞི་བྲལ་རྣམས་ཞུས་ནས། སྐྱེས་ཚོགས་དད་པའི་གཞུང༌། བསླབ་སྤྱོད་ལྟ་བའི་གཞུང༌། ས་རྒྱན་སྤྱོད་པའི་གཞུང་སྟེ་བཀའ་གདམས་གཞུང་དྲུག་ཏུ་གྲགས་པ་དང༌། མདོ་སིལ་བུ་བ་བཅུ་བདུན། མཆིམས་ནམ་མཁའ་གྲགས་ཀྱི་ས་བཅད་དང་བཅས་པ་ལ་སོགས་རབ་ཏུ་མང་པོ་གསན་ནོ། །རྡོ་རྗེ་ཐེག་པའི་སྐོར་ལ་དབང༌། རྒྱུད། མན་ངག །རྗེས་གནང༌། ལུང་དང་ལྔ་ལས། དང་པོ་དབང་གི་སྐོར་ལ། རིགས་གསུམ་སྤྱི་དབང༌། ཚེ་དཔག་མེད་ལྷ་དགུ །གཙུག་ཏོར་གདུགས་དཀར། གཟུངས་གྲྭ་ལྔ་ལ་སོགས་པ་བྱ་རྒྱུད་ཀྱི་དབང་དུ་མ་དང༌། ཨ་ར་པ་ཙ་ན་ལྷ་ལྔ། མི་འཁྲུགས་པ་ལྷ་དགུ་ལ་སོགས་པ་སྤྱོད་རྒྱུད་ཀྱི་དབང་དང༌། རྡོ་རྗེ་དབྱིངས་དཀྱིལ་ཆོག་ལུགས། འཇམ་དཔལ་གསང་ལྡན། ནམ་མཁའ་དྲི་མེད་ཆུང་བ། གཙུག་དགུ། རྩ་སྐྱ་པ་ནས་བརྒྱུད་པའི་སྦྱོང་རྒྱུད་དཀྱིལ་འཁོར་བཅུ་གཉིས། ས་ལུགས་ཀྱི་ཀུན་རིག་སྟེ། རྣལ་འབྱོར་རྒྱུད་ཀྱི་དབང་དང༌། གཤེད་དམར་ལྷ་ལྔ་མ། ལྷ་བཅུ་གསུམ་མ། དགྲ་ནག །འཇིགས་བྱེད་ཞེ་དགུ་མ། རོ་ལངས་བརྒྱད་