[A:༦༠༠]བཅུ་བཞི་ཙམ་ཞིག་གིས་མཐར་ཕྱིན་པར་མཛད་ནས། གཞིར་གནས་ཀྱི་རྟེན་དཀྱིལ་འཁོར་བཞི་ལ་སྨིན་བྱེད་ཀྱི་དབང་བཞི་བསྐུར་ཞིང༌། གྲོལ་བྱེད་ཀྱི་ལམ་བཞི་བསྒོམས་པས་སོ་སོའི་ལྟ་བ་བཞི་རྒྱུད་ལ་སྐྱེས་ཤིང༌། གྲུབ་མཐའ་བཞི་དང༌། འབྲས་བུ་བཞི་འདྲེན་པའི་སྙན་བརྒྱུད་བཞིས་གདམས་པར་མཛད་དེ། རྒྱུ་དུས་དང་ལམ་དུས་ཀྱི་དབང་གི་ཆུ་བོ་མ་ནུབ། ཉམས་མྱོང་མཚན་ཉིད་པ་སྐྱེས་པས་བྱིན་རླབས་ཀྱི་བརྒྱུད་པ་མ་ཉམས། གང་ཡང་ཏིང་ངེ་འཛིན་དུ་བཀྲོལ་ཤེས་པས་གདམས་ངག་གི་ས་རྒ་མ་ལོག །དེའི་སྟོབས་ཀྱིས་བླ་མ་ལ་སངས་རྒྱས་དངོས་ཀྱི་འདུ་ཤེས་སྐྱེས་པས་མོས་གུས་ཀྱི་བསམ་པ་ཚིམ་པར་མཛད་པ་ཡིན་ནོ། །དེའི་ཆོས་སྐོར་ལ་རིང་བརྒྱུད་དང་ཉེ་བརྒྱུད་གཉིས་ལས། དང་པོ་ནི། ཞང་དགོན་པ་བ་ནས་བརྒྱུད་པ། རྗེ་བཙུན་གྱི་གླེགས་བམ་དཀར་ཆག་ཏུ་ཐེབས་པ་རྣམས་ཡིན་ལ། དེ་ཡང་ཚད་མ་བཞི་སྟོན་པ་ལས། བསྟན་བཅོས་ཚད་མ་ལ་འགྲེལ་པ་གཉགས་མ། སྐབས་ཀྱི་ཡིག་ཆུང་ཉེར་གཉིས། དོན་བསྡུས་མའི་ཚིགས་བཅད་དེ་ཉེར་བཞི། ཉམས་མྱོང་ཚད་མ་ལ་གཞུང་ལས་འཕྲོས་པའི་ཆོས་བཅུ་བདུན། རྩ་བ་མེད་པའི་ལམ་འབྲིང་པོ། རང་གི་རྩ་བ་ཅུང་ཟད་དང་བཅས་པའི་ལམ་བསྡུས་པ། ཁྲིད་ཀྱི་གཞུང་ཤིང་ཆེན་པོ་བཞི། རྟོགས་པ་སྐྱེད་པར་བྱེད་པའི་ཆོས་ལྔ། ལམ་ཟབ་མོའི་ཡིག་ཆ། མན་ངག་ཕྲ་མོའི་རྐང་གྲངས་གཞན་དུ་ཁ་འཕངས་པ་སྟེ་སུམ་ཅུ། བླ་མ་ཚད་མ་ལ་བླ་མ་རྒྱ་བོད་ཀྱི་ཡི་གེ་གཉིས། ལུང་ཚད་མ་ལ་ལུང་སྦྱོར་ཁ་འཕངས་དང་བཅས་པ་བཞི་སྟེ། དྲུག་ཅུ་པོ་དེ་དག་ཡོངས་སུ་རྫོགས་པར་གསན་ནོ། །མན་ངག་ཕྲ་མོའི་རྐང་གྲངས་པོད་དམར་མའི་ནང་དུ་བཞུགས་པ་རྣམས་དང༌། ཕྱིས་གསན་པ་གཞུང་བཤད་སྲས་དོན་མ། གཞན་ཡང་དམར་གྱིས་མཛད་པའི་བླ་མའི་རྣམ་ཐར་ཞིབ་མོ་རྡོ་རྗེ་དང༌། གཞུང་བཤད་དམར་མ། བར་སྟོན་གྱི་ཟིན་བྲིས་སོགས་རབ་ཏུ་མང་པོ་དང༌། བླ་མ་དམ་པ་བསོད་ནམས་