[A:༥༩༩]གཏོང་ཕོད་ཆེ་བས་གདུལ་བྱའི་རྒྱུད་ལ་རྟེན་འབྲེལ་ཁྱད་པར་ཅན་བསྒྲིགས་པའི་ཆེད། སྔོན་གྱི་བླ་མ་རྣམས་ཀྱི་ལོངས་སྤྱོད་མང་པོ་འབུལ་བ་ཞེས་མཛད་པ་ཡིན། དེང་སང་བསྟན་པ་འགྲིབས་ནས་གསུང་ངག་ལ་སོགས་པའི་བཀའ་ཆད་ལ་ཁད་དུ་སོང་འདུག་པས། གདུལ་བྱ་སྣོད་ལྡན་བྱུང་ན་གསུང་ངག་དང་དབང་བསྐུར་ལ་སོགས་པ་བརྡལ་གཏོད་ལྟ་བུ་བྱས་ནས་ཀྱང༌། བསྟན་པའི་རྒྱུན་ལ་ཕན་དུ་རེ་བྱེད་དགོས་པའི་དུས་སུ་སོང་འདུག་པ་ཞེས་གསུངས་སོ། །འདི་ནི་ད་ལྟ་གསུང་ངག་རིན་པོ་ཆེ་ལ་སོགས་པའི་བཀའ་སྲོལ་རྣམས་བཟུང་ནས་འགྲོ་བ་ཡོངས་ཀྱི་མགོན་སྐྱབས་མཛད་པའི་རྟེན་འབྲེལ་ཁྱད་པར་ཅན་གཟིགས་པ་ཡིན་པར་ངེས་སོ། །དེ་ནས་རྟ་ལོའི་དབྱར་གསུང་ངག་རིན་པོ་ཆེ་གསན་ནས་ཐུགས་ཉམས་སུ་བཞེས་ཏེ། སྟོན་མུས་སུ་ཕེབས་ནས། ལུག་ལོ་ལ་མུས་སུ་བཞུགས་པའི་ཚེ། བླ་མ་ནམ་བློ་བས་སྤྱིར་སངས་རྒྱས་ཀྱི་བསྟན་པ་ལ་ཕན་པ་དང༌། བྱེ་བྲག་ཏུ་ཕྱོགས་འདིའི་དགེ་འདུན་རྣམས་དང༌། བྱ་ཉ། རི་དགས་རྣམས་ཀྱི་མགོན་སྐྱབས་མཛད་དགོས་ཞུས་ནས་དགོན་པ་ཡང་ཕུལ་ཏེ། ཁོང་རང་དཔོན་སློབ་རྣམས་ཀྱིས། ཀྱེ་རྡོར་དང་ཀུན་རིག་ལ་སོགས་པའི་བཀའ་མང་དུ་ཞུས་ནས། དེ་དག་གི་ལག་ལེན་གྱི་སྲོལ་ཡང་འཛུག་པར་མཛད་དོ། །དེའི་སྟོན་ཆོས་རྗེ་བཟང་པོའི་ཞབས་མངའ་རིས་སུ་དཔོན་པོ་ཨ་མ་དཔལ་གྱིས་གདན་དྲངས་པའི་རྗེས་སུ། གསང་སྔགས་དབོན་པོ་གཞོན་ནུ་བཟང་པོ་སོགས་གྲོགས་མཆེད་བདུན། ཆོས་རྗེའི་བཀའ་ཞལ་དང་བཅས་ཏེ། རྗེ་འདི་ཉིད་གདན་འདྲེན་བྱུང་བས། ཞེ་གཅིག་པ་སྤྲེའུའི་ལོ་ལ་ས་སྐྱར་ཕེབས། དབྱར་ཤཱཀ་བཟང་སྐུ་འབུམ་དུ་བཞུགས་ནས། ཁམས་གཙང་གི་གྲྭ་པ་རྣམས་ལ་རང་རང་གི་བློ་དང་འཚམས་པའི་ཆོས་ཀྱི་འཁོར་ལོ་བསྐོར་བར་མཛད་དོ། །དེའི་སྟོན་ཆོས་རྗེ་མངའ་རིས་ནས་ཕེབས་མ་ཐག་ཏུ། སླར་ཡང་གསུང་ངག་རིན་པོ་ཆེ་ཟླ་བ་བདུན་གྱི་བར་དུ་ཉམས་ཁྲིད་དུ་ཞུས། དང་པོར་བདུན་ཅུ་ཙམ་གྱིས་ཞུས་ཀྱང༌། ཕྱིས་རྗེ་འདི་ཉིད་སོགས་