[A:༥༩༨]ལས་གདམས་པ་རྒྱ་མཚོ་ལྟ་བུ་ཐོས་ཤིང༌། ཡོན་ཏན་གྱི་མཛོད་དུ་གྱུར་པ་ནི་ཆོས་ཉིད་དོ། །དེའང་འདི་སྐད་ཐོས་ཏེ། ཆོས་རྗེ་བཟང་པོའི་ཞབས་ཀྱི་དྲུང་དུ་མཇལ་མ་ཐག་ནས་བརྩམས་ཏེ། འབྲུག་ལོའི་སྟོན་ཚུན་ཆད་ལ་བདེ་དགྱེས་གསང་གསུམ་གྱི་སྨིན་བྱེད་ཀྱི་དབང༌། བསྐྱེད་རྫོགས་ཀྱི་མན་ངག །རྒྱུད་ཀྱི་བཤད་པ་དང་བཅས་པ་གསན་ཅིང༌། དེ་ནས་རྡོ་རྗེ་ཕྲེང་བ། ཀྲྀ་ཡ་ས་མུཙྪ་དང་བཅས་པ་ལ་སོགས་པའི་ཆོས་ཀྱི་བཀའ་དྲིན་དཔག་ཏུ་མེད་པ་ནོས་པར་མཛད་དོ། །མེ་ཕོ་རྟའི་ལོའི་ནང་དུ། ཆོས་རྗེ་བཟང་པོའི་ཞབས་ལ་བར་ཆད་ཀྱི་མཚན་མ་གསལ་བའི་ཕྱིར་དུ། སྐུ་མཚམས་ལ་བཞུགས་ནས། སྐུ་མཚམས་གྲོལ་བའི་ཞག་གཅིག་གི་གོང་དུ། རྗེ་འདི་ཉིད་དང༌། མངའ་རིས་པ་བླ་མ་དཀོན་མཆོག་འོད་ཟེར་གཉིས་སྐུ་གདུན་དུ་བོས་ནས། སྤྱིར་ཐུགས་དམ་གྱི་གཟིགས་སྣང་དང༌། བར་ཆད་སེལ་ཚུལ་སོགས་མང་དུ་གསུངས་ཏེ། ད་ལན་སྐྱོན་དུ་སོང་ན་ཡང་གཞན་སེམས་ལ་འཕྲེང་བ་ཅིག་ཀྱང་མེད། བྱ་སྤྱོད་གཉིས་ཀྱི་བསྟན་པ་འདི་འདོད་པ་བཞིན་སོས་མ་ཐུབ་པ་འདི་དང༌། ཁྱེད་རང་གི་ཕན་ཐོགས་མི་ཐོགས་གང་ཡིན་ཀྱང༌། ཁྱོད་སློབ་དཔོན་དཀོན་རྒྱལ་ལ་ལམ་འབྲས་ཚང་མ་ཞིག་མ་འཕྲོད་པ་འདི་འཕྲེང་བར་འདུག་ཅེས་གསུང་ངོ༌། །དེ་ལ་རྗེ་འདི་ཉིད་ཐུགས་བཞེད་པ་ཅིག་ཀྱང་བྱུང་ཞིང༌། བླ་མ་ཐུགས་དགོངས་གང་ལ་གཏད་ཀྱང་ད་ལམ་འབྲས་ཤིག་ཞུས་ནས་དགེ་སྦྱོར་གྱི་མཐིལ་དེ་ལ་བྱེད་དགོས་པ་འདུག་སྙམ་པ་འཁྲུངས་སོ། །ད་ནས་ཆོས་རྗེའི་དྲུང་ནས་བདག་མུས་སུ་ཕྱིན་ནས། འཁོར་ལོ་བདེ་མཆོག་གི་དགེ་སྦྱོར་ཅིག་བྱེད་པ་ལགས་ཞུས། ད་དུང་ངེད་ལ་གསུང་ངག་ལམ་འབྲས་ཡོད་པས་དེ་ཉོན་ཅིག་གསུངས་པ་ལ། ལམ་འབྲས་ཞུ་བ་ལ་འབུལ་བ་མང་པོ་དང༌། བཀའ་སྤྱད་མང་པོ་དགོས་པའི་ལོ་རྒྱུས་འདུག་པས། བདག་ལ་དེ་ལྟ་བུའི་ནུས་པ་མེད་ལགས་ཞུས་པས། ཆོས་རྗེའི་ཞལ་ནས། སྔོན་གྱི་དུས་ན་བསྟན་པ་ཡར་སོའི་དུས་སུ་སོང་བས། གདུལ་བྱ་རྣམས་ཆོས་ལ་དོན་གཉེར་དང༌། ཆོས་ཕྱོགས་སུ་དཀའ་སྤྱད་དང༌། ལོངས་སྤྱོད་