[A:༥༩༧]བཟང་པོ་དེ་ཡོན་ཏན་ཆེ་ཞིང༌། སྒལ་ཚིགས་བཟང་བ་ཅིག་ཡིན་པར་གྲགས་པ་ཅི་འདྲ་ཡིན་དྲིས་པས། ཁོང་ན་རེ། སྤྱིར་གསུང་རབ་སྤྱི་ལ་མཁས། ཁྱད་པར་བདེ་དགྱེས་ལ་སོགས་པ་ས་སྐྱ་པའི་ཆོས་སྐོར་ལ་ཤིན་ཏུ་མཁས་ཤིང༌། སྒལ་ཚིགས་བཟང་ཟེར་བ་ཡང་སྡེ་དཔོན་སོགས་ལ་བསྟུན་ཕྱོགས་མི་མཛད་པ་མ་གཏོགས། གྲྭ་པ་ལ་ཤིན་ཏུ་བརྩེ་བས་ཉམ་ཆུང་གི་བླ་མ་ཡང་དག་པ་ཅིག་ཡོད་ཟེར་བ་གསན་མ་ཐག་ཏུ། རྟག་ཏུ་ངུས་ཆོས་འཕགས་ཀྱི་གཏམ་ཐོས་པའམ། སེ་སྟོན་ཀུན་རིག་གིས། མུ་གུ་ལུང་གི་ཐད་ཀྱི་སྤྲིན་དཀར་པོ་མཐོང་བ་ལྟར། ཐར་པའི་ལམ་སྟོན་པའི་དགེ་བའི་བཤེས་གཉེན་ཡིན་པར། ངེས་ཤེས་གཏིང་ནས་འཁྲུངས་ཏེ། དེའི་ཞབས་དྲུང་དུ་བསྙེན་ནས་བདེ་མཆོག་ལོ་ནག་དྲིལ་གསུམ་གྱི་ཆོས་སྐོར་ཡོངས་སུ་རྫོགས་པར་ཞུས་ཏེ། གཡེང་བ་ཆེ་ཆུང་གང་གི་ཡང་དབང་དུ་མ་སོང་བར་ཉམས་ལེན་ལ་དྲིལ་བ་ཅིག་བྱ་དགོས་སོ་སྙམ་པའི་གོ་ཆ་དང་རྟག་ཏུ་མ་བྲལ་བར་མཛད་དོ། །དེའི་སྟོབས་ཀྱིས། ཡོས་ལོའི་མཇུག་ཏུ་ཆུ་འདུས་ནས་ཚུར་རེས་ས་སྐྱར་བྱོན། ཤཱཀ་བཟང་སྐུ་འབུམ་ན་དྲུག་པ་རྡོ་རྗེ་འཆང་གི་ངོ་བོ་རྗེ་བཙུན་ཀུན་དགའ་བཟང་པོ་བཞུགས་པའི་དྲུང་དུ། མཁན་ཆེན་ཤཱཀ་བཟང་པ་བརྒྱུད་དེ། བདག་ལ་ལོ་ནག་དྲིལ་གསུམ་གྱི་ཆོས་སྐོར་ཡོངས་སུ་རྫོགས་པ། རྩ་རྒྱུད་ཀྱི་བཤད་པ་དང་བཅས་པ་ཅིག་སོས་ཀ་ཚུན་ལ་རྫོགས་པར་གནང་དགོས་ཞུས་པས། ད་ལྟ་མཚམས་དམ་པ་ཅིག་ལ་ཡོད། འདི་ཚོ་ལ་ལྟ་རྟོགས་གྱིས་གསུངས་ནས་བདེ་མཆོག་གི་དཔེ་ཆ་འགའ་ཞིག་གནང་བྱུང་སྟེ། དེའི་ངང་ལ་ཟླ་བ་གཉིས་ཙམ་སོང་ནས། སོ་བདུན་པ་ཤིང་ཕོ་འབྲུག་གི་ལོ་ཤར་བའི་ཚེ། མཁས་གྲུབ་གཞོན་ནུ་སེང་གེ་པ་ལ་ཞུ་བ་བསྐུར་ཏེ། དེ་མ་ཐག་ཏུ་མཇལ་ནས། བླ་མ་ལ་མི་ཕྱེད་པའི་དད་པ་སྐྱེས་ཤིང༌། བླ་མས་ཀྱང་ཐུགས་དགེས་པའི་སྒོ་ནས་རྗེས་སུ་འཛིན་པར་མཛད་དོ། །གཉིས་པ་ནི། བླ་མ་མཆོག་ལས་ཞེས་སོགས་ཚིགས་བཅད་དྲུག་སྟེ། སྐྱེས་བུ་དམ་པ་རྣམས་ནི་ཡོངས་འཛིན་མཆོག་