[A:175b] nyes dmigs 'byung ba la dgongs pa yin zhes rje bsod nams chos 'phel sogs gsung bar grags shing / bdag gi bla ma mkhan chen 'jam pa'i dbyangs kyi bzhed pa ni/ sgo ma bzhi po 'phrin las bsgrub pa la myur bas/ 'gro ba dbang du 'du ba dang / zang zing gi dpal 'byor rgyas par byung tshe/ rnam g.yengs che bas dge sbyor la gnod par 'gyur ba la dgongs pa yin zhes gsungs shing / legs bshad 'di ni mkhas pa'i gsung rmad du byung ba yin pa blo gsal rnams kyis snying la 'chang bar rigs so/ /de dag gis ni rje tshar chen gyi dri ba lhag bsam rab dkar las/ bdag chen kun dga' dbang phyug gsung rgyun las/ /'od ldan dpal gyis mdzad ces sgrub yig 'di/ /kha cig a gnyan dam pas mdzad ces gleng / /phyis byon 'ga' dag gzungs pas mdzad ces smra/ /dang po ltar na dam pas sbags sgrub kyi/ /yi ge mdzad na bla chen bsod blo bas/ /