[A:166a] gdam ngag phyag bzhes/ khrid bka' lung bka' dang bcas pa legs par gsan nas ma lus pa khong du chug par mdzad de/ dgung lo bcu bdun la nye ba'i tshe/ rgyud sde bcu bzhi thugs la gsungs shing / ganggA tshun chad la rdo rje theg pa mtha' dag la mkhas par yongs su grags so/ /de nas dgung lo bcu bdun bzhes pa'i tshe/ bla chen kun dga' snying po mya ngan las 'das pa'i rjes kyi bya ba rnams grub nas/ rje pa dgung lo bcu gsum pa la/ ngas dbus su phyin la phar phyin dang tshad ma la sogs pa mnyan la 'ong / khyod sa skyar sdod la bshad pa gyis gsungs te gdan sa gtad nas/ gsang phu ne'u thog tu cha pa chen po chos kyi seng ge la chos gsan pa la snga phyir lo bcu gcig tsam gyi bar du bzhugs nas mkhas pa chen por gyur te/ gser gyi gandzi ra dang / yum rgyas pa dang gzhan yang zang zing gi dngos po mang du phul