[B:14a]rgya gar gyi grub chen mi thub zla ba'i sprul par grags/ 'dis lo bcu bdun gyi bar la yab bzhugs pas| yab la zab rgyas kyi chos mtha' dag dang / de rting cha pa chos kyi seng ge la dbu tshad/ byams chos sogs legs par gsan pas mtshan nyid kyi chos la shin tu mkhas/ ston pa bzang bas jo sras gsum gyi gcig tu byed/ cha pa la gser gyi 'gan ji ra dang / yum rgyas pa sogs 'bul ba dang bsnyen bskur mang pos mnyes par mdzad/ de rting dpal ldan sa skyar mkhas grub kyi skye bo mtha' yas pa bsdus te/ sngags mtshan nyid kyi 'chad rtsod rtsom gsum dri ma med pa dang / zab rgyas
[A:29]kyi thugs dam zab mos nyin mtshan skad cig kyang mi g.yel ba'i ngang nas gdan sa lo sum cu mdzad zer mkhan yod kyang nyer gsum mdzad nas/ dgung lo zhe gcig pa chu pho stag gi smal zla'i tshes bcu gcig la dpal sa skyar zhi bar gshegs te/ rgyas par rnam thar chen mo rnams su blta'o/ /rje btsun chen po ni/ lo 'di'i rjes la 'di mdzad la sogs pa'i rgyas pa ni rnam thar chen mo rnams su blta bar bya la/ 'dir ni mdor bsdus te dad pa dang / tshul khrims dang | thos pa dang / gtong ba dang / shes rab phun sum tshogs pa rnams kyis shes par bya ste de yang / dang por dkar chos mtha' dag gi rtsa ba dad pa phun sum tshogs pa ni/ spyir bla ma dang dkon mchog la shin tu mos pas sku tshe ril po bla ma rnams kyi ched du rten gsum khyad par can bzhengs pa dang / dus mchod 'dzugs pa dang / mchod pa 'bul ba dang / tha na rten gyi drung du mchod pa bshom pa tshun chad la rtsal du 'don zhing / khyad par bla ma yab sras la rdo rje 'chang