[A:58]nas bla ma ye shes 'od// chos rgyal de yis skyes bu mchog// rin chen bzang po kha cher brdzangs// zhes sogs bshad pa ltar te/ de la 'phros don gyi rnam bzhag spyir bstan pa dang / skabs don rgyas par bshad pa gnyis/
dang po ni/ bcom ldan rig ral sogs/ bstan pa snga dar/ phyi dar/ bar dar gsum du mdzad nas/ dang po 'dra ba la/ gnyis pa bar dar ni/ mi bcu sogs kyis dbus gtsang du bstan pa spel ba la ngos bzung nas/ gsum pa phyi dar ni/ lo chen rin bzang dang / 'gos lo tsA ba sogs kyis bstan pa spel ba man chad yin gsungs/
mkhas pa 'ga' zhig 'di mi 'thad de/ snga dar phyi dar gnyis 'byung ba ni/ bar du dar mas bstan pa bsnubs nas bstan pa'i rgyun chad pa zhig byung ba'i rgyu mtshan gyis yin la/ bar dar zhes pa ni sgro btabs kho na yin te/ khyed 'dod pa'i bar dar de nas snga phyi'i bar du bstan pa med pa'i bar stong byung ba med pa'i phyir zhes gsungs so/ kho bo cag kyang de nyid sems te/ mi bcu nas/ 'gos lo sogs kyi bar du bstan pa gong 'phel kho na las cha zhan du song ba'i skabs cung zad kyang med pas/ bar dar gyi tha snyad mi mdzes pa'i phyir dang / khyed ltar na bstan pa snga dar nyid la yang / mes ag tshom yan chad snga dar dang / khri srong lde btsan nas bar dar/ khri ral pa can nas phyi dar zhes gsum du 'byed rigs pa ha cang thal te/ rgyu mtshan ci'i phyir na/ mes ag tshom gshegs nas khri srong lde btsan nar ma son gyi bar der/ ma zhang sogs bdud blon gsum gyes bstan pa la rma chen po phyung ste/ bstan pa med pa lta bur byas 'dug pa'i phyir ro/ des na snga