[A:59]dar dang phyi dar gnyis kho na yin la/ de yang gtso bor yul dbus gtsang dang bstan pa rab byung 'dul ba'i bstan pa'i dbang du byas te/ dar mas bstan pa bsnubs rjes/ 'dul ba'i las kyi cho ga'i lag len sogs nub nas yun ring du rgyun chad kyang / gsang sngags rdo rje theg pa'i zab don nyams bzhes sogs ni dngos sam sbas pa'i tshul gyis rgyun ma chad par byung ba'i phyir ro/
'o na bstan pa med pa lo du ma zhig byung snyam na/ 'di la deb sngon las/ khams nas bod yul dbus su bstan pa byung ba'i dus mtshams ni/ bu ston rin po ches/ rgan mo zhig gi ngag gi rjes su 'brangs nas/ lcags mo bya la bstan pa bsnubs nas/ bdun bcu rtsa gsum pa chu mo bya la bstan pa byung ba yin zhes gsungs la/ bstan pa'i gdung rabs la shin tu mkhas pa'i 'brom ston pa'i zhal nas bdun cu rtsa brgyad pa sa pho stag la byung ba yin zhes gsungs so/
sa pho stag nas drug cu rtsa lnga pa chu pho rta la a ti sha bod du byon zhes sogs bshad mod/ de ni bu ston gyi gsung la zhib tu ma brtag pa ste/ chos 'byung las/ de ltar dbus gtsang du bstan pa med pa lo bdun cu byung nas dbus gtsang mi bcus bstan pa btsugs pa yin te/ mi bcus dbus su byon tsa na/ rgan mo zhig na re/ nga lo drug lon pa na btsun pa mthong zer/ ji tsam lon dris pas bdun cu don drug lon zer bas so/ zhes zer/ kha cig brgya rtsa brgyad song zer ro/ zhes lugs bkod pa tsam ma gtogs/ bu ston rang lugs 'di yin gsal bar bshad pa med pa'i phyir dang / khyad par don gsum pa chu mo bya la bstan pa'i thog mar cung zad kyang ma bshad