[A:114] lo chen 'di/ bka' gdams pa'i karma pa sher 'od dang dgung mnyam/ glang shar gnyis kyi glang thang pa las lo gsum gyis gzhon/ sha ra ba las lo bcu gsum gyis bgres/ thugs sras sku mched gsum gyi po to ba las lo bcu bzhis gzhon/ bka' brgyud pa'i rje mi la las lo bcu bdun gyis gzhon/ dwags po pa las nyer gsum gyi bgres/ ras chung pa las nyer brgyad kyis bgres/ lam 'bras pa'i bla ma se mkhar chung pa las so gnyis kyis gzhon/ zhang ston chos 'bar las lo bzhis gzhon/ dpal ldan sa skya pa chen po las lo sum cu rtsa lngas bgres pa yin no/ zhes bshad par bya'o/ ma gcig zha ma chu pho stag lo ma ste
spyi lo 1062
lo chen las drug gis gzhon/ rje mkhan bu sa mo bya lo pa ste ma gcig las lo bdun gyis gzhon no/ gzhan 'di dang sku bgres gzhon gyi rim pa cung zad ma gtogs thog mtshungs tsam du byon pa la/ pu rangs lo chung grags mchog shes rab/ de'i slob ma dmar chos rgyal mtshan/ dmar do pa chos kyi dbang phyug/ mal gyo blo gros grags 'di rnams sku ngo man chad la dpal 'khor lo bde mchog gi rgyud bshad/ man ngag gi zab chos dar/ rwa lo tsA ba rdo rje grags nas gshin rje gshed nag po'i rgyud man ngag dar/ mnyan lo tsA ba dar ma grags dang / gnas kha'u pa nas gsang 'dus ye shes zhabs kyi rgyud man ngag dar/ lo tsA ba btsan kha bo che nas byams chos kyi man ngag dar/ pa tshab lo tsA ba nyi ma grags kyang / sha ra bas khong la slob ma phul nas dbu ma'i 'chad nyan mdzad pas/ slob ma tshig la mkhas pa gangs po/ don la mkhas pa gtsang pa sa pa/ tshig don gnyis ka la mkhas pa rma bya byang chub ye shes/ gnyis ka la mi mkhas pa zhang thang zag pa ste bzhi byung zhing dbu ma dar/