[A:100] gung thang pa nag tsho tshul khrims rgyal ba pho nyar mngags te/ bod gangs ri'i khrod 'dir nye bar phebs pa'i rngo thogs pa lags so/
de yang pan chen 'di shing pho rta la sku bltams/ lo bdun rgyal khab tu bzhugs/ bcu dgu'i bar du gnyis spangs kyi spyod pa bskyangs/ bzhi bcu'i bar du mkhas grub kyi yongs 'dzin bsten/ drug cu'i bar du rgya gar chos bzhin bskyangs/ re gcig pa shing pho rta lor stod mnga' ris su byon lo gcig bzhugs/ shar lam gtsang phyogs su lo gnyis bzhugs/ dbus su lo bcu bzhugs te don gnyis pa me pho rta'i dbyug zla'i tshes bco brgyad la snye thang nas dga' ldan du gshegs so/
'o na jo bo'i lam yig nag tsho'i gsung brgyud pa snar thang pa u pa dha ri dang mchims thams cad mkhyen pa'i rnam thar na/ jo bo shing rta la sku gshegs zhes 'byung bas/ bod du chu rta la phebs par grub cing / 'brom gyi lam yig na'ang / chu pho rta'i lo la bod du byon/ zhes bshad pa dang mi 'gal lam snyam na/ de dag ni yi ge ma dag pa la yid brtan bcas pas bab col te 'brom gyi lam rim bar ma na/ me pho rta'i lo la sku 'khrungs nas zhes pa yang yod mod/ de ltar bris pa dang chu pho rta la bod du phebs pa bris pa gnyis 'gal ba'i phyir te/ drug cu skor gcig 'das pa'i lo rta thog mtha' dbang thang gcig pa'i phyir ro/
yang deb sngon sogs las jo bo tshes nyi shu la gshegs zer ba yang ma dag pa 'dra'o/ de ltar jo bo mnga' ris su tho thing (ling) gi gtsug lag khang du lo chen rin bzang dang mjal/ 'bel ba'i bka' mchid rab tu bgyis