[A:45]su ston to zhes gsungs pa dang / de la nges par de ltar yin pa'i nges shes kyang skyes so/ /gzhan yang chos rje sa skya pa chen po'i rnam pa nyid 'khor byang chub sems dpa' chen po brgyad kyis bskor ba'i dbus na bzhugs pa gzigs/ bcom ldan 'das dgyes pa rdo rje 'khor lha mo brgyad kyis bskor ba'i sprul pa'i dkyil 'khor g.yas na bzhugs pa dang / de bzhin gshegs pa shAkya thub pa 'khor kun shes kauNDi nya la sogs pa dgra bcom pa brgyad kyis bskor ba g.yon na bzhugs pa'i bkod pa rnam par 'phrul pa chen po mngon sum du bstan nas khyod rab tu byung na su la rab tu byung / dbang bskur ba len na gang la dbang len zhes gsungs pa dang / bdag rab tu byung ngam dbang bskur len na mkhan por gyur pa dang / rdo rje slob dpon du gyur pa ni chos kyi rjer gyur pa khyod nyid do zhes zhus pas/ de kho na bzhin te khyod kyis legs par rtogs pa de kho na bzhin no zhes dbugs dbyung nas lung bstan pa dang / gzhan yang 'di ltar thos te/ bdag cag gi chos kyi rje 'di sku gshegs pa'i dus kyi dgung lo gnyis kyi gong rol na/ bde ba can gyi zhing khams su spyan 'dren pa lha'i pho nya'i bkod pa dpag tu med pa rnams la rnam grangs du ma'i sgo nas phyir bzlog go /de nas yang lo gcig gi gong rol du lha'i tshogs dpag tu med pa dag 'jig rten gyi khams mi mjed 'di'i mi bsngags pa brjod de/ bde ba can gyi bsngags pa dpag tu med pa brjod pa'i sgo nas spyan 'dren par brtson pa rnams la/ kho bo 'jig rten gyi khams bzang ba la chags pa mi skye/ ngan pa la mngon par mi dga' ba med la/ sangs rgyas kyi zhing yongs su sbyong ba la 'jig rten gyi khams dman pa nyid khyad par du 'phags pa yin zhing / gzhan yang bdag la nye bar ltos pa'i mgon med par